壽爺澳門嚴斥董團夥事件，阿董回港之後將壽爺嘅訓斥當係稱讚，重話佢感到「驕傲」，當堂將事件升格為國際級醜聞。
唐唐重話，壽爺對董團夥嘅只不過係「勉勵」！因此，抵制壽爺訓示，唐唐亦變咗頭號幫兇！
據聞，阿董唾面自乾嘅反應，連親中社團好多老愛國都覺得十分震駭！明明係壽爺震怒拍枱，聽在阿董耳中就變咗同佢唱情歌，初初重以為佢揣摸上意好叻。原來阿爺話東，佢就估錯咗西，中方話大，佢就以為叫佢買細，咁七年來，由小人蛇至二十三條，阿董又估錯咗中央阿爺幾多鋪呢？左佬紛紛抹冷汗，話唔敢再諗落去！
受訓斥當聽好消息，聽見粗口當唱聖詩，一個人若然可以做到阿董咁開朗樂天，莫講話少病痛，簡直可以活到一百零三歲㖭至少！
原來團夥喺受靶之後，經已第一時間研究壽爺嘅口水成份，睇吓有冇惡性病毒，結果係如唐唐所講，壽爺嘅說話正面，充滿肯定同勉勵。做醫生嘅周一嶽終於睇唔過眼，昨日出面補鑊，話「勉勵」都係一種「教訓」！
正如詩姑亂中博懵，講咗句「功能組別選舉亦係普選之一種」，董團夥指鹿為馬、屈貓為狗嘅大話精能力，經已冇乜人質疑。
壽爺在澳門，用眷愛嘅眼神掛咗煲呔紅燈籠，阿董提早執包袱消息又起，曾爵爺攝政有望。唔知係咪出於眼紅，有消息人士話，阿董不但唔會退，重愈罵愈勇，準備親自掛帥，狠抓「西九龍」同領匯兩單蘇州屎，實行絕地一煲！
西九龍明明係煲呔嘅baby，阿董一手搶咗去，除咗想打沉煲呔，亦係一招食位之計。西九龍有排磨爛蓆，諮詢、爭議、講價、公投，搞得嚟都到○七，若然阿董食住呢個位，正所謂穩定壓倒一切，壽爺又豈敢半途將佢踢走？阿董儍唔晒，咁係又一例證。
只不過煲呔就有少少唔抵，自己辛苦開荒，阿董掠奪果實，亦錯有錯着，雙普選經已硬食咗一嘢，西九龍又俾阿董標松柴，咁樣反為可以博到同情分。滿懷委屈，對住壽爺「哇」一聲喊出嚟：「佢曳曳，又搶咗我個玩具囉！」話唔定會得到補償㖭。煲呔暗暗上位起飛，實力不可低估，不過，重有個太子章，會唔會係螳螂捕蟬黃雀在後呢？
點都好，今年聖誕，對於倒瀉籮蟹潰不成軍嘅團夥，真係一個超勁黑色聖誕囉！
傳真︰2623-9278
電郵︰