平安夜，聖善夜，在浪漫氣氛感染下，拖友仔特別感情用事，有意無意間會去做愛做的事，㗎仔㗎妹過節慶祝完，飲大少少就會變成感情動物，日本有好多特色情侶酒店（LoveHotel），環境布置同氣氛能夠帶來唔同嘅感受同樂趣，平安夜──更加有藉口令人做錯事！
記者、攝影：張一豪
模特兒：Calvin（M3ProductionLtd.）、Katie（StarAaia）
年近歲晚人人狂歡
日本人其實唔特別重視聖誕節，不過因時近元旦假期，節日頓成過新年前狂歡的藉口，踏入12月，不少日本人會搞「忘年會」狂歡，目的係將過去一年不快事一掃而空，聖誕節唔少人玩得更癲，飲大兩杯，男女間擦出火花有下文並唔出奇。日本有好多特色情侶酒店，設備齊全夠氣氛，故大時大節前特別興旺，日本大阪松原市的HotelLoire，就食住呢個旺季前大裝修，改建很多主題房間，迎合不同情侶需要。
據店長西村先生說：「嚟HotelLoire嘅多數係20幾至30幾歲人士，40歲以上都唔少，星期六、日及假期前大把情侶幫襯，佢哋屋企無咁多SM架生，貪我哋呢度有，平日一般會有4至7成入住率，到星期五晚或假期前經常有10成房爆滿，好多人攞唔到房。」
和風宮廷暗藏殺機
日本人對本身文化情有獨鍾，情侶酒店點都要整番間和式套房，古色古香之餘亦「暗藏殺機」，房內有唔少SM器材，你睇到嘅唔係《受難曲》續集，而係SM情慾十字架，床頭重整咗條粗鎖鏈㖭！刺激定情趣？玩嗰個至知喇，不過打者愛也，愛對方就吊起佢嚟打，包佢唔會唔記得呢個平安夜喇！
超豪法式宮廷
如果想正路少少，過番豪華一夜，呢個法式豪華房就啱晒，入面設備豪華，特色是全能遙控自動化，由電視、卡拉OK、打機、到叫RoomService，一個遙控器在手就搞掂。玩到攰，重有豪華電動按摩椅鬆一鬆，咁就唔怕腰痠背痛，玩通宵都重得。
太空房數星星
㗎仔出名想像力豐富，情侶酒店主題房玩到上太空，嫌見慣見熟嘅SM設備太單調的話，房裏預備咗一間充滿太空科幻Feel嘅SM器具。房間本身已經勁太空Feel，熄燈之後四面牆會發出螢光，唔玩SM，同另一半玩室內數星星一樣浪漫。
癡漢角色扮演
日本癡漢舉世聞名，但做癡漢係犯法嘅，唔少㗎仔其實都有「潛在癡漢願望」，為一嘗抽水滋味，就會去有角色扮演設備嘅房間同伴侶過吓手癮，HotelLoire都有間二合一角色扮演房，裝修到勁似電車廂與診療所，畀客人滿足吓幻想。
100%絕密爆房！
香港時鐘酒店門口有阿差，Counter有阿姐級接待員，日本部份LoveHotel並無設立接待處，就如HotelLoire，無接待員掩掩揚揚，開房唔使怕尷尬，所有Checkin及Checkout收費，全由房內自動收費機計算，除使用RoomService外，完全唔涉及第三者，爆房保密度幾達100%。
其他特色服務
HotelLoire服務多完化，喺房入面可以唱K、打機、談情說愛外，重有其他服務等客人可以玩得開開心心，話佢係情侶遊樂場並不為過，而且全部都係用收費機埋單，全不假手於人。
HotelLoire
地址：大阪府三宅中7-9-13
電話：（81）72-336-5001
收費：
短聚90分鐘：平日6:00am至12:00mn、星期六日及假期前6:00am至2:00am，基本租金約$298至$408。
過夜長房：平日9:00pm至12:00nn、星期六日及假期前9:00pm至10:00am，基本租金約$598至$787。
網址： http://www.hotel-loire.jp/
交通：地下鐵谷町線喜連瓜破站3號出口，出松原三宅公路向南走20分鐘。