黃伊汶（Emme）從小到大都十分重視西方節日，每年普天同慶的聖誕節更必定選擇與家人共度，今年她就請家人吃聖誕大餐。提到聖誕節，她笑言十三歲那一年過得最難忘，因為她親身上演了一幕「迷失東京」。
黃伊汶每年都十分重視聖誕節，因為她自小便會與家人到酒店食聖誕大餐，共敍天倫，而今年當然也不會例外。不過Emme表示並不是每個聖誕節都過得美滿幸福，十三歲那一年的聖誕便留下了一個慘痛的回憶。
Emme回憶說：「我十三歲嗰年，阿媽就帶我同家姐、細佬去日本旅行，咁聖誕嗰一晚媽咪就同個朋友自己去咗行街，我就同家姐、細佬三個一齊行，點知行行吓我自己一個人走失咗。」
當時只得十三歲的Emme身上既沒有手提電話，加上語言不通，頓時感到不知所措，她說：「當時只係聽到啲日本人喺度咕吱咕吱咁講嘢，都唔知佢哋講乜，之後我就一個人係咁行，行咗個幾個鐘頭之後又俾我見到自己住嗰間酒店喎，咁我咪上番房等家姐同細佬囉，再隔咗一個鐘佢哋就返到嚟，我哋三個重即時攬埋一嚿，呢件事當時阿媽梗係唔知啦。」
此外，由於Emme曾到加拿大留學，體驗過白色聖誕，有年她在香港過聖誕時竟忽發奇想，買了一塊發泡膠板將它刨碎自製雪景，Emme說：「當時我覺得香港冇雪景嘅聖誕節真係好唔掂，咁咪刨碎塊發泡膠，之後就走上天台放雪扮落緊雪，點知有其他住客投訴，最後重俾阿媽鬧咗一大餐。」
採訪：李珮洳
攝影：葉君海
髮型：Chin.G
場地提供：ElCidSpanishRestaurant（CausewayBay）
