董特首率領眾高官到澳門述職，似足一群中學生見校長，肅立聽校長教訓：胡主席訓示眾港官要總結過往七年嘅經驗，提高管治水平。內地名詞之中，總結即是檢討，總結經驗即是話過往做得好差，唔該你哋醒醒定定，以後做好啲。
主席願望會唔會落空呢？當然會。以前冇問責制，董特首話啲港英遺臣唔得落力，各自為政，冇認真幫佢，所以第二屆政府就要改制，請非公務員入政府做司長、局長，兼要問責。一聲問責，大件事咯，人人顧住自己檔攤先，其他局長管轄之事，千祈咪搞我，於是大家各自為政，唔見有團隊精神，問責變成卸責，總之俗啲講句，你死你事。
嗱，不因人廢言，一位高官對左丁山講過，第二任政府之中，最落力、最肯負責、心口寫個勇字嘅三位司長局長，梁錦松、葉劉淑儀、楊永強，都因不同理由下馬，其他局長有冇兔死狐悲呀？似乎佢哋得到嘅教訓就係多做多錯、不做不錯，唱慢板永遠唔錯。廖秀冬、何志平、葉樹堃等篤撐查撐，幾好吖；孫明揚搞地產就頭崩額裂，曾蔭權推動西九龍，慘被打成曾灶財，李國章力推三三四學制，已經背後中箭無數，馬時亨曾因仙股事件以及最近嘅領匯風波，弄至灰頭灰臉，睇怕唐英年如果真係大力推銷產品及服務稅（銷售稅），分分鐘馬失前蹄。
事既如此，董特首想總結經驗，提高管治水平，未免過份樂觀。不如乜都唔好搞，個個月去放吓假，淨係賣地，每年賣二三十幅靚地，不增加任何公共開支，凍結一切收費水平，等多兩年，退任鬆人啦。