胡錦濤訓斥董建華真係餘波未了，噚日都重有唔少外國傳媒，專文報道批評老董管治。好似專注財經新聞嘅「彭博」通訊社，就由仙股事件開始，將呢兩年嘅管治危機包括23條、阿松偷步買車，以至沙士事件全部數晒出嚟，引證胡主席嘅講話，叫做幫埋唔肯認有管治問題嘅老董，「總結經驗、查找不足」；而股壇長毛DavidWebb更直截了當話老董因為係欽定，冇民意基礎，所以要左閃右避立法會。
新加坡亦都好關注香港嘅動向，英文《海峽時報》噚日再整多兩段文章講老董被片。其中一段係由香港新聞界老行尊程翔執筆，佢篇文章話，老董嘅管治能力係比鏵哥差㗎啦，不過都唔可以怪得晒老董嘅，始終澳門唔同香港，香港一直屬於西方社會嘅圈子，澳門就唔係，所以香港同北京嘅互信基礎有限，所以就難管治囉！
傳真︰2623-9278
電郵︰