普世歡騰嘅聖誕節就快到，今年經濟好轉，節日氣氛特別濃。發展商都花心思，幫售樓處裝身，添上聖誕色彩。好似長實東涌映灣園，今年將售樓處由和記大廈移師到華人行，趁聖誕來臨，喺售樓處搞飄雪樂園，令參觀人士耳目一新。
聖誕節期間同埋除夕及元旦日，都會有唔同嘅應節活動，聖誕老人同天使齊玩飄雪外，現場重有五個不同國家嘅布景板，畀市民拍照留念。參觀嘅市民重有機會抽獎，所有聖誕朱古力禮包，由長實海逸酒店送出。
同系嘅宇晴軒，聖誕節期間同樣有應節活動。
大嶼山明年有亞洲第二個迪士尼樂園落成，到時將吸引各地遊客到來。不過，今年遊樂場未啟用，映灣園先搞各式繽紛活動畀市民玩，預先感受吓歡樂氣氛。
太古地產擔大旗發展嘅廣州太古匯，噚日動土，發展兩座共百七萬呎寫字樓、八十六萬呎酒店、近百二萬呎商場及逾百萬呎文化中心加停車場，車位逾千，投資約四十億人民幣。
太古佔九成七，廣州日報佔其餘權益，項目總樓面四百萬呎，○八年落成，由太古管理。
有報道話，香格里拉負責營運酒店部份，不過太古簡基富話，重同幾間酒店傾緊未有決定。
近年淡出香港地產發展嘅太古，認為廣州發展快，語言和發展模式接近香港，政策開放，係太古投資沿岸城市嘅踏腳石。
太古匯結合文化同商業元素，不過飲恨西九嘅太古，唔肯再評論西九嘅發展。
從事建築業三十多年嘅佳明控股，除咗在港大展拳腳，原來喺內地都有唔少發展項目。
佳明董事總經理陳孔明（圖三）話，早前投資廣東省、深圳同埋布吉等。同時，喺廣西主要城市南寧市中心，有兩塊地皮，共百五萬呎，投資兩億，計劃興建商業大廈同埋住宅。陳孔明話，揀選廣西，主要因為佢係交通樞紐，有發展前景。
南聯地產噚日停牌，涉重大交易，市傳約以七億，賣出半幢荃灣國際訊通中心畀基金，呎價約千二，回報六厘。
經紀話，南聯曾非正式喺市場放呢個盤，多個基金洽購，貪佢租金收入穩定，傳易手嘅一至十一樓五十幾萬呎，租緊畀兩間大型速遞公司，呎租六蚊，有半年成交期。該廈共二十七層，○○年以九億賣畀建生同大摩基金，但一至十一樓最後未有完成交易。
南聯今年積極賣嘢，包括以兩億五，賣出觀塘經緯工業中心，今次賣埋國際訊通中心，將共收近十億，推算佢哋想集中火力，搞好觀塘創紀之城附近嘅巨無霸發展。
屋宇署最新批出呢個巧明街項目，可建兩幢商廈，一幢三十八層，一幢四十一層，總樓面百二萬呎。
市場普遍對明年樓市態度樂觀，聖誕節日氣氛濃厚，無減投資者入市計劃。
中記蔡日基話，港島投資者，計劃用八千一萬，買十伙大角嘴維港灣。
聽講，呢位投資者，一直活躍於港島豪宅市場，今次計劃買對岸物業，主要睇好鐵路上蓋物業前景，作長線投資。洽購中嘅單位，為第七座中高層同埋一座低層，呎價約五千三。
發展商都搞聖誕節活動，越秀嘅薄扶林富臨軒，管理公司喺平安夜安排聖誕老人派禮物，聖誕假日期間，則舉行燒烤嘉年華，等住戶都可以過一個精采難忘嘅聖誕節。
另外，信和主辦嘅「信和荃灣聖誕奇景之旅」，𠵱家至下月二日，喺荃灣楊屋運動場舉行，面積達十八萬方呎，大賣白色聖誕主題樂園概念，現場有各種真雪及冰上活動。
呢個活動部份收益會捐畀「健康快車」，為有需要人士帶來光明，有得玩又可以做善事，一舉兩得。
深圳賣樓手法借鏡香港。百仕達明年三月推出深圳紅樹西岸，對於買家最關心嘅價錢故作神秘，希望賣到好價。呢招，香港賣豪宅成日用。
百仕達羅雷話，要到差唔多開賣先定意向價，𠵱家逐步介紹樓盤資料，市場會自行估計價錢，而且發放資料愈多，市場預計嘅價錢愈高，所以唔急於定價。
佢好有信心咁話，𠵱家深圳樓價，每米最高一萬蚊，紅樹西岸一定會超過呢個價錢。
羅雷重話，紅樹西岸十月以信託單位形式，優先接受二百個準買家登記，每個信託單位八十萬，到物業開賣時，可以優先購買，並且享有折扣，當中有兩成係香港人。
電郵地址：
