林嘉欣啱啱喺台灣發展時，張洪量係佢嘅經理人，佢兩個之後都重傳過緋聞，但後尾佢哋反面收場，然後星皓公司就簽咗林嘉欣嚟香港發展。直到幾個月前，嘉欣公開承認咗同陳光榮嘅新戀情。不過佢嘅舊緋聞男友張洪量提起嘉欣依然㷫烚烚，重話嘉欣實在太叻講大話。
日前張洪量喺南京出席一個音樂會時，佢同內地記者講起林嘉欣，即連珠炮發咁話：「林嘉欣實在太會說謊了，她不僅傷害了我，更傷害了當初幫助她的所有人，如果沒有我們，怎麼會有今天的她？她竟然說我因追求不成將她雪藏七年，實在太過份了，不過現在回想起來，這與她的性格和人品是相符的。她能這樣對傳媒胡說八道，太沒良心。」馮仁昭覺得一涉及感情嘅事，旁人就好難分得清誰是誰非。
李克勤噚日喺港台接受陳淑蘭訪問，蘭子話覺得有個歌手做男友係好甜蜜嘅事，克勤即打趣話許志安𠵱家冇拖拍正是好人選，點知蘭子卻顯得甚為嫌棄，重話：「我唔得㗎，我知佢要同屋企人住，我咁free，實激死老人家啦。」
劉若英早排客串演出華視劇集《雙響炮》，飾演苦命藝妓。原來劉若英以為自己會去日本拍攝，可以順道浸埋溫泉，但最後夢想落空，重要喺內地由朝頭早七點拍到半夜三更，真係名副其實嘅「苦命人」呀！
懷孕三個月嘅楊婉儀噚日接受商台電話訪問，佢話自從有咗BB之後，個人好易發𤷪𤺧，自己留喺屋企重會亂諗嘢，所以佢就寧願日日開工，起碼有人同佢傾偈會開心好多，佢話：「之前我接咗嘅工作都會做，等個肚大到郁唔到，先至會停。」
應采兒日前出庭應訊涉嫌藏毒，佢人前人後兩副嘴臉，又話想打巴記者，早前藏毒罪成嘅吳浩康噚日喺新城話：「唔知係點，但打人就唔好，佢未必真係要打人。佢如果真係打人，除非以後唔做呢行。」而噚晚吳浩康就去咗尖沙嘴出席「04慈善音樂夜」活動，獻唱一曲。
有內地消息報道話同高峰因一宗「私生子案」而「一夜成名」嘅王納文，將會進軍樂壇，同那英再「較量」，對於簽約楊瀾唱片公司一事，王納文就話佢哋確實有過非正式接觸，佢重充滿自信咁話：「駕馭一張唱片是不成問題的。」
