有意大利足球教父之稱嘅沙基，日前獲皇家馬德里委任為總監（前譯總經理），而據講皇馬為佢提供一份「永久生效」嘅合約，位高權重。
各國傳媒已預測皇馬會人事「大地震」，重可能會意大利化。可能因為今季華倫西亞意大利化唔多成功，據調查顯示，有三成半球迷認為沙基加盟皇馬，係大浩劫，值得放長雙眼睇。
沙基上任後，無論搵邊個做教練、球員轉會都由佢經手，西班牙傳媒傳佢未來會棄用個別球員（包括嚟到長唞嘅活基治），同時帶托迪、卡斯辛奴同埋佢愛將基拿甸奴等意大利兵加盟。呢啲消息流定堅要時間驗證，但球迷顯然傾向唔睇好沙基上任對皇馬有好處。
報章《ElMundo》調查顯示，有三成半人話佢加盟係皇馬大浩劫，只有兩成幾人覺得佢會幫到皇馬。皇馬近年人事明爭暗鬥，呢次真係考沙基功力啦。
之前有報道指，二○○六年德國世界盃球賽周進行期間，各球場只能夠售賣美國百威啤酒，即時引起好大迴響。據講經過有關方面討價還價同埋商業交易後，到世界盃決賽周時各球場獲准賣德國牌子嘅啤酒。德國人好講民族性，𠵱家知道世界盃時唔使齋飲美國品牌，肯定放下心頭大石。
國內傳媒公布李鐵成為中國球員首富，除咗周薪介乎一萬五千至二萬鎊外，加埋獲李寧牌體育用品贊助費，估計年薪達到七百五十萬人民幣。至於今年國內最多收入球員就喺效力山東魯能嘅李霄鵬，單係全年人工已經四百萬人民幣。中超聯今年搞到咁，下季有無咁好景都唔知。
噚日講曼城聖誕節派對，估唔到重有其他衝突事件，中場J巴頓發現一名青年軍球員試圖用火機燒着佢件衫，隨即用一支點着咗嘅雪茄戮向對方隻眼；而J巴頓亦遭報復，俾人用酒樽打到頭破血流，最後俾球會罰咗十萬鎊（約一百四十萬港元），等於佢一個半月人工，肉赤咯！
昆士柏流浪季初喺英冠一度躋身三甲，只係近排回落，但𠵱家重排前十名。話時話聖誕新年大賽日，要十一日踢四場波，對呢類細球會實好難頂，最慘係據報近期大軍受流感影響，領隊已宣布直至平安夜先復操，畀戰將有充份休息，真係唔知會唔會影響二十六日作客普利茅夫場波？
逢周一至周五見報