昨日又係濠賭股獨領風騷，好幾隻股仔只係傳下可能變身賭業股，已經可以炒得一大餐，重係有大成交配合，小初覺得濠賭股已陷入瘋狂狀態。
好似奧瑪仕（959）旗下希臘神話賭場將於今日開幕，噚日股價最高抽過上4元，收3.675元，升幅仍有10.53％，成交金額高達9.4億元。小初唔係想潑人冷水，但就想大家諗清楚，隻股家陣實在唔便宜，加上奧瑪仕只係揸住希臘神話十零個巴仙，話事權有限，投資者跟風炒賣，真係要小心。
另外，風扇生產商滙多利（607）早排股價升咗，成交亦大咗，相當熱鬧。經紀陳話，江湖傳聞滙多利公布中期業績後，可能有批股集資活動。
滙多利截至今年7月首季業績，盈利上升14.9％，賺1437萬元，如無意外，中期業績應該會幾靚，交出成績先至搞集資，應該唔會有難度。
滙多利噚日無起跌，收1.17元，成交金額789萬元。
慕容小初