美股隔晚咁掂，港股未有跟隨，皆因周一先升咗2百幾點。美股04年有望高收，帶旺港股，𠵱家策略仍然係吼低揸C輪而唔係吼高揸P輪。
中企C輪2204：前日推介中企C輪2204，當日最高見12.6仙，上落速度好快，昨日低見10.9仙，高位回落達13.5%，收11.1仙，單日跌幅5.1%，跟國指唔見23點而跌落去。國指跌23點，國壽（2628）跌0.15元，市傳鄭裕彤私人揸國壽禁售期滿，以5.35-5.40元做「披成」。國壽回落至5.40元，差唔多矣，消息消化後，國壽有機會回穩甚至輕微反彈，唔再拖累國指。其他重磅國企例如中石化（386）與兗煤（1171）有勢，可拖高國指，加上年底通常國企炒炒吓，揸中企C輪有運行，主角例牌係2204。隻輪下月尾夠鐘，溢價1.7%，槓桿率13.8倍（有效10.0倍），引伸波幅32.0%。其他同類輪，冇隻夠佢靚。1個月前最高價18.4仙，𠵱家剩番6成，升起上嚟大把水位。
國壽C輪4531：國壽跌0.15元，末日C輪2143散28%，收23.8仙，溢價0.7%，槓桿率15.4倍，今日最後買賣，無謂搞呢隻。
喺低位博國壽反彈揀C輪，4531比較適合，明年3月尾到期，輪價75仙，溢價2.8%，槓桿率7.2倍（有效5.6倍），引伸波幅35.4%，數據可接受，交投麻麻係缺點。
中電信C輪2149：中電信（728）冇升跌，C輪2149跌3%，收20.4仙，溢價縮到1%，槓桿率有14.3倍（有效11.4倍），引伸波幅23.9%，重有1個月先夠鐘，諗得過。
章盛