呢排喺銅鑼灣成日見到人龍出現，以為排隊買關刀鞋，原來排隊買「儍氣事」同日本搞嘅特別版T恤。過兩日，同一間舖又見人龍排隊買公仔。自從「搪膠公仔泡沫爆泡」後，已經冇乜人再搶購呢類概念商品，就算早前本地創作人同關刀合作搞展覽賣特別版公仔，場面仍然冷清，不禁叫人諗起松哥嗰句：「有咁耐風流，有咁耐折墮」。今次能引起熱賣嘅係隻16吋高交叉眼米奇公仔，由塗鴉界溫文小俊哥KAWS設計，造型可愛，話晒佢有世界知名度，難怪！
現場碰見潮玩界草根小富豪「豬膶王子」，只要同潮流掛勾的場合佢都會出現，畀錢以表支持。「豬膶王子」拖住靚女小老婆並冇排隊，唔通已有人為佢代勞？「因為已有相熟舖頭幫我留起兩套，一套拆盒玩，另一套收埋。聽到呢邊有人排隊，咪過嚟趁吓！呢隻KAWS米奇非常正斗，一定要買啦！」其實所有產品只要同「潮流」兩個字掛勾，對「王子」來講都有吸引力，令佢掏荷包畀錢。佢話想幫屋企間麵舖翻新，重新定位，用時下流行嘅概念店形式賣豬膶麵，搵埋本地潮界創作人，幫佢設計隻吉祥物供顧客換購，最厲害甚至想搞埋展覽，以Gallery形式去賣豬膶麵；如果成事，相信好多時事記者或研究學者有興趣跟進。
主持人：大食Jack
八卦熱報：[email protected]