壽爺澳門怒斥董團夥（之所以尊稱總書記為壽爺，係因為現在經已唔再係「三點水」嘅「江」戶時代。冇咗三點水，壽哥先至可以翻身作主人，加埋自從江伯交槍落台，今年祖國當堂大旱缺水，因此濤哥變壽爺，實在係至in嘅應景尊稱），震撼珠江三角洲，成為特區中環全日話題。
好多親中分析員話，壽爺嘅說話落到咁重磅，斥董揀正公開場合，有心叫電子傳媒直播，原汁原味一氣呵成，省到阿董眼耳口鼻亂作一團，幾乎五官大翻兜，有報紙頭版大特寫圖片為證，你話打擊力度有幾咁勁，壽爺一坐正，做嘢雷厲風行，真係睇唔到有乜迹象，壽爺會准許阿董就此佔着茅坑，任由佢啲蘇州屎屙足兩年半，屙到二○○七。
因此，保留茅坑，提早換人，睇嚟好可能出現喺壽爺日理萬機嘅議事Agenda。因為一個月內共有四單勁抽嘢爆煲：公務員減薪、紅灣半島、西九龍、領匯，呢一隻速度同密度，壽爺幾好老脾，都係冇可能接受到。長痛不如短痛，過埋農曆年，會唔會喺人大開會前後，特區呢個舊茅坑，會出現一位踎塔嘅新主人？
若然壽爺真係咁英明，又有乜人可供選擇呢？前日在澳門，壽爺逐個接見團夥成員嘅時候，分析員指出：早已露晒天機！
大熱之一嘅唐唐，排到佢同壽爺握手，佢無限熱情地對壽爺致以尊崇問候之後，略為停頓，似乎等壽爺有所回應。點知壽爺好Cool咁點吓頭，木無笑容，搞到唐唐冇晒癮，好似走馬燈咁速速轉畫彈開！
分析員話，若然係我哋唐唐，咁壽爺就唔會咁冷感喇。之不過，對煲呔嘅面口就唔同嘞！煲呔企最側，壽爺變咗第一個同煲呔握手，好快，一股暖流，直擊煲呔嘅心臟，搞到煲呔笑容綻放！說時遲，那時快，壽爺重即時叫出煲呔嘅芳名（係嗌名，唔係嗌冧巴喎！），無限憐愛地問：「早上過來的？」煲呔未料到有咁巨大嘅意外搭單收穫，即時眉開眼笑咁答：「剛來的！」跟住就企在原位，接受壽爺陽光般的眼神嘅撫慰。直到喺身邊嘅廖公見到唔對路，出面嗌Cut，叫煲呔快啲行埋一邊，咪阻住下一個上位，煲呔先至狀似如夢初醒咁行開。
分析員話：睇嘢呀嗱！若然廢董明年三月保外就醫，攝位扶正嘅，又點會係唐唐？廢董若然無法再霸着茅坑拉蘇州屎，遭到壽爺一腳星開，由煲呔攝廁，幾成定局！當奴，你係得嘅，MerryChristmas！
傳真︰2623-9278
電郵︰