聖誕節對於西方人嚟講可以話係全年最大嘅節日，所以英超聯就算冇歇冬，喺聖誕正日，球會通常都會畀球員放假一天。不過，目前喺英超聯領導群雄嘅車路士，佢哋嘅領隊摩連奴已表明話喺聖誕節當日冇假放，要如常操練。
車仔領隊摩連奴話：「家庭當然比足球重要，但作為職業球員，由於我哋拆禮物日有波打，所以我哋會如常喺二十四號同二十五號操練。」摩連奴重話：「雖然球隊目前喺榜首領先五分，但一個唔小心，呢個優勢可能隨時冇晒，所以我哋唔能夠鬆懈。」
講開車仔，佢哋嘅中場柏加就認真唔好彩。呢名英格蘭球員由於今屆長居後備，萌生去意，重成為唔少球會喺一月轉會市場重開時嘅羅致對象，點知佢喺上星期六對諾域治場波後備上陣時勇戰跖骨骨裂，起碼要唞到新年，試問又邊有球隊會買佢呢？
聖誕節唔少球迷都會布置屋企，但話說有一個叫保雲嘅狼隊球迷，佢趁同居女友莎莉出街時，將屋企棵聖誕樹噴上代表狼隊嘅金色同埋黑色，重將狼隊嘅圍巾同埋球員相一張張掛喺樹上。當莎莉返到屋企時，見到棵「狼隊聖誕樹」，即刻嬲到飛咗保雲，呢個世界真係無奇不有！
英超球員喺聖誕派對上鬧事或者互毆呢啲新聞呢幾日都聽唔少，不過曼城前鋒安歷卡就另類啲；佢喺曼城嘅聖誕派對上面，俾飲醉咗嘅曼城球迷打，因為佢哋唔滿意安歷卡成日話要離隊踢大球會。最唔好彩嘅都算係安歷卡在場嘅朋友，因為佢哋都俾曼城球迷打埋一份。
雖然一月轉會市場未開，但英超球隊熱刺已動作多多，繼借得捷克後衞林伯斯基後，英傳媒又話佢哋成功截些路迪胡，簽到安德烈治嘅瑞典中場威武臣。威武臣喺一個月前先話些路迪適合佢，但佢日前已改口話熱刺先係佢理想球會，估唔到威武臣嘅口風同佢速度一樣轉得咁快。
呢個聖誕拆禮物日（二十六日）香港時間凌晨三點NBA有場重頭戲，由奧尼爾嘅熱火作客拜恩領軍嘅湖人；兩位昔日隊友、今日仇人首次碰頭，肯定有場好戲；噚日奧尼爾就先爆響口，叫拜恩喺場波度咪阻頭阻勢。睇完籃球後當晚七點開始直落睇英超七場直播，球迷真係好唔得閒。