日本男星押尾學兩個月前為咗拍攝李力持執導嘅電視劇《中華小當家》，喺橫店逗留咗一個多月。早前套劇已經煞科，押尾學返到日本接受最新一期日本雜誌《JUNON》訪問嗰陣，即刻大吐苦水。
押尾學早前喺內地橫店逗留三十五日，拍攝佢第一部內地電視劇《中華小當家》，對於今次中國之行，押尾似乎有頗多不滿。佢話當日由上海搭咗五個鐘頭車到達偏僻嘅拍攝場地，嗰度就好似動畫《千與千尋》入面嘅山野一樣咁荒蕪。
由於成個劇組只係得佢一個日本人，言語不通嘅押尾有時只好留喺酒店，不過佢話酒店好污糟，酒店房入面嘅電視雖然有四十幾個台選擇，但係就連一個英文台都冇。而佢自己帶去嘅i-Pod又唔小心跌壞咗，認真黑過墨斗。
不過，押尾學最唔滿意嘅似乎係伙食方面，佢話當地只有茶而冇咖啡，而且每朝早只有用膠袋裝住嘅小籠包做早餐，而晏晝就食冷冰冰飯盒，食慣好嘢嘅押尾嚟講當然唔習慣啦。押尾話佢最初都食唔落，但一唔食又有烏蠅飛埋嚟搶，惟有喊住口咁夾硬吞落肚，搞到佢狂瘦七公斤。