聖誕節假期快到，八方有個好介紹，就係今個禮拜五開始嘅「黃永玉八十藝展」，展出鬼才畫家黃永玉嘅八十件畫作。畫展名為「八十藝展」係因為黃永玉已經年屆八旬，難得嘅係呢位大師仍然不斷創作，而且思想開放。
黃永玉開懷樂觀嘅思想同佢嘅文學家表叔沈從文有關，沈從文對人對事都係溫和淡然，用微笑承擔苦難，黃永玉最記得表叔呢一句：「我一生不相信權力，只相信智慧。」可惜香港嘅高官十居其九都只相信權力，不擁有智慧。
畫展喺香港藝術館舉行，由十二月底展出到三月底。黃永玉特別委託八方尋人，尋找一個素昧平生嘅老太太。話說一九八九年黃永玉喺香港開畫展嘅時候，有位衣着純樸嘅婦人塞咗張字條過佢，係一條撕落嚟嘅報紙邊，上面寫住：「道盡人間斷腸句，至今惟有鳳凰人。」湖南鳳凰係黃永玉嘅家鄉，黃永玉深受感動，尤其是當時係六四之後，佢追出去想結識老太太，但係婦人嘅身影已經湮沒於人海。黃永玉今次再開畫展，好想老太太再次撥冗光臨。
傳真︰2623-9278
電郵︰
