都話港人嘅模仿能力強過鸚鵡，中國國家主席胡錦濤訓斥廢董嘅十六字真言「總結經驗、查找不足」同埋「和衷共濟、相互支持」，瞬即成為立法會議員同官員之間互窒嘅胡錦濤認可標準用語。立法會噚日開會追究王永平，點解放水畀鍾麗幗幫地產商，議員王國興先學主席嘅口脗，叫王永平要「總結經驗、查找不足」，王永平即刻回敬，不過就連胡主席發表嘅重要訓話都搞錯，三番四次將「查找不足」講成「尋找不足」，「查找」係國語，而且係一個命令，就係叫你一定要搵到，但「尋找」即係話搵唔到都冇辦法，改一個字就搞到個意思唔同晒。暗中篡改皇上金口聖旨，王永平咁蠱惑，若然早二百年，佢就推出午門斬首。
不過周圍又冇人醒水提佢，於是王某又話，胡主席除咗呢句之外，重叫立法會長等人以整體利益為重，「和衷共濟、相互支持」。李卓人則打蛇隨棍上，叫佢記得係「互相支持」，而唔係「互相包庇」。
傳真︰2623-9278
電郵︰