吳文忻、姚樂怡、李思蓓、趙靜儀同歐綺霞（Monique），前晚為佐敦JulianaDisco開幕禮擔任嘉賓，一齊着睡衣行天橋。
不過幾位靚女嘅睡衣相當密實，冇乜睇頭，反而吳文忻未換睡衣前嘅一身打扮，就真係令人大飽眼福。原來吳文忻為咗襯條tubedress，專登戴番個隱形胸圍，點知記者啲相機閃燈一打落佢身上，隱形胸圍即刻現晒形，場面真係幾搞笑！
講到聖誕節點樣過，吳文忻話會去朋友間補習社開party，到時諗住玩《獎門人》遊戲，例如淋濕身之類。由於吳文忻目前冇經理人幫佢傾工作好唔方便，所以佢都希望快啲物色到合適嘅經理人。
而姚樂怡就話聖誕期間同無綫請咗假，推咗部劇，因為聖誕好多登台騷做，佢梗係搵錢至上啦！
樂隊Beyond噚日接受商台訪問，講到最近有人投訴買唔到佢哋尾場演唱會嘅飛，話佢哋黑箱作業好黑暗，黃家強回應：「我諗佢可能太遲買飛啫，一啲都唔黑暗。」黃貫中話：「我都唔知點解啲人係都要買尾場，我話你哋聽，我哋第一場係最好睇，尾場可能好求其㗎。」
無綫今年直播「香港電影金像獎頒獎典禮」，因為播廣告而將節目亂cut一通，連影帝劉德華攞獎嘅感謝詞都被cut，俾觀眾鬧到七彩。雖然當時無綫同金像獎方面各執一詞，搞到翻臉咁滯，但出年「金像獎」雙方會繼續合作，只係無綫唔敢再做直播，改為延遲一小時嘅轉播啫。
內地演員黃磊最近執導緊劇集《夜半歌聲》，女主角係大S徐熙媛，而男主角何潤東就啱啱先開始拍攝工作，佢哋日前重拍咗場喺三千朵玫瑰襯托下鴛鴦戲水嘅戲㖭。之前有傳導演想換男主角，何潤東就話只係檔期有啲棘手，不過佢話導演冇打算換角，劇組重特別由北京飛去橫店幫佢試造型㖭！
官恩娜（Ella）噚日去商台接受訪問時，着住短裙，露出一雙修長美腿，但佢呢身裝扮搞到佢朝早被「非禮」。
Ella話：「我今朝（即噚日）去咗海洋公園同一班小朋友影相，影影吓相突然發現有人將隻手伸入我條裙度，嚇咗我一跳呀，後尾知道原來係啲小朋友多手啫。」
西九龍文娛藝術中心嘅發展計劃，各大地產商都爭住分一杯羹，連粵劇名伶陳劍聲同汪明荃最近都被傳各自聯同地產商爭奪發展項目。噚日陳劍聲出席展覽會時，被問到如果佢或者汪明荃其中一個爭取到發展權，大家會唔會聯手合作？陳劍聲即面黑黑咁話：「唔知喎，都未諗過。」
