領匯上市失敗咗，而被親中派定性為「老不死」嘅盧少蘭又未上訴終審庭，事件處於暫時靜止狀態，雖然房委會同唔少法律界人士都好肯定，政府今鋪贏硬，不過有民主黨大狀同八方講，佢哋研究過判詞，發現盧婆婆未必輸晒，某啲法律觀點重有得打，董團夥唔好笑得咁早。
領匯呢一鑊泡，搞到胡錦濤主席又多一個理由大罵老董。民主黨嘅李柱銘前日十一點幾睇完電視，就好嬲咁打電話畀八方話，睇到香港啲官俾人咁鬧法，真係好唔開心，最衰都係班選委，罪魁禍首，盲目挺董連任，搞到今日咁嘅地步，報紙就應該將當日提名老董嗰七百一十四個選委嘅名字，重登一次，等全港知道，老董死喺邊一班人嘅手。
傳真︰2623-9278
電郵︰