九鐵尖東站啟用後，成個區即刻身價大增，區內單位梗係唔肯平賣，部份買家惟有承接投資者嘅摸貨。過去一個禮拜，就有四單。
中記陳玉雲話，經過個幾月拉鋸後，買家終於投降，為咗趕喺明年首季升浪來臨前入市，連炒家貨都要接。中長線投資者今次贏一仗。
尖東新港中心高層六室，近二千呎，九月成交價近八百六十萬，剛以一千零五十萬摸出，執近二百萬，升值近兩成三。帝后廣場高層一及八室，共一千五百五十呎，十月作價五百二十七萬，現以五百八十九萬轉手，兩個月賺六十二萬。
另兩單摸貨係港晶中心中層六及七室，三千四百五十呎，炒家獲利五十二萬；以及新東海商業大廈高層十一室，近千四呎，炒家賺五十五萬。
以國際形象包裝嘅中環國際金融中心，商場第一間中式食肆正式開業，就係有三十幾年歷史嘅中菜館利苑酒家。
呢間佔地七千呎嘅酒家，為咗配合國金高級形象，專程搵嚟時裝設計師夏嘉懋，為侍應設計制服，男女侍應穿着嘅金色上衣，企領設計，兼有刺繡。
經營酒家，除咗食物質素重要外，亦講求門面包裝。
酒家主席陳樹杰，搵嚟室內設計師橋本夕紀夫同埋孫希松幫手，為店舖設計。店內用上竹、木同埋石頭等天然物料，展現大自然感覺。
利苑酒家只係開咗幾日，唔少中區食客已經聞風而至。
樓市火熱，買家好多時大歎銀行估價唔貼市，要抬錢上會，但近排市道靜番，情況剛好相反，銀行估價可以高過成交價。
利記周樂話，小欖漣山Cedar一座低層D，千一呎，連車位賣價二百六十八萬，每呎唔使二千四，而銀行估價就可以達三百五十萬。
周樂話，呢類單位市價要三百萬，業主一直叫緊二百八十至二百九十萬，見買家有誠意，自己又想盡快賣出單位，搬番出市區，遷就仔女讀書，所以肯減啲價。
漣山有三十五個二手盤，每呎叫價三千。發展商有四個貨尾，其中Cedar一座六樓D，千二呎，要近三百六十萬，每呎近三千。
西九龍文娛藝術區，三個入選財團嘅發展建議書，已經公開展覽緊畀市民睇，各個財團仍然千方百計，希望增加見報率。
其中由信和置業、九龍倉與華人置業合作嘅「藝林」，除咗喺報紙登廣告，話畀市民知，可以進入佢哋嘅網頁，𠵱家重出埋月曆（圖四）。
蘭西都收到一個，覺得設計都幾特別，橢圓形，外形似個欖球，側面睇就似中東一座酒店。另外，月曆每個月都印咗名人金句。
其他嗰兩個財團，睇完「藝林」出招後，唔知又有乜嘢動作呢？
澳門回歸五周年，政經好過香港好多，樓市重不斷升溫。金豐易居中國業務部董事劉志傑話，有三個內地家庭，合資齊齊投資澳門樓，過去半年，動用近千萬，購入六個海名居單位。
佢哋啱啱沽出其中一件，短時間賺咗七十五萬，信心大增，於是轉戰寫字樓市場，以九百萬買入大馬路中華廣場高層兩個相連單位，共四千五呎，呎價兩千。
個單位現由澳門政府部門租用，回報六厘。
買家計劃收吓租先，等第二日個價升咗至賣。聽講，佢重想增持寫字樓。
電郵地址：
