領匯擱置上市，恒指彈升221點，事後孔明式解釋係大市前面少咗一嚿黑雲。昨日個市若然下跌，則解釋係領匯上唔到市係元兇。如果有人睇準領匯俾人block住無法上市而做淡友，揸Put輪、空期指，則人算不如天算。
中企C輪2204：國指收4808，升29點，升幅0.6%，細過恒指1.6%嘅升幅。大市再度有番勢，國企追上去好應該，買中企C輪有運行。
中企C輪最正路嘅係2204，昨收11.9仙，升幅6.3%，未夠。隻輪明年1月尾到期，溢價1.3%，槓桿率13倍（有效10.2倍），引伸波幅28%。趣趣哋國指短期內上番月初高位5000點，然後上試年初高位5400點，揸隻2204賺到笑。中企C輪4545昨升5.2%，又係熱門同類輪，壽命長過2204三個月，但槓桿率低3成，而溢價又高出3個百分點，點計都比唔上2204。遲吓啦，到咗下月，2204將近到期，4545溢價縮番，則有機會成為主角。
中信C輪4483：恒指彈得急，最落後係駿威（203），冇郁，其次係中信泰富（267）。買落後，揀相關C輪埋手。駿威C輪得隻2289睇得上眼，但數據唔靚兼成交唔多，無謂嘥火藥。
中信C輪正路之選係4483，輪價26仙，溢價7.2%，槓桿率8.4倍（有效4.8倍），引伸波幅33.3%。咪嫌溢價高，隻輪明年10月先至到期。
滙控C輪4441：滙控（005）升2元，C輪4445升11仙，4441升得8仙，最值得追落去。
章盛