國足成員鄭智正喺修咸頓試腳，估唔到另一國足成員郝海東率先成事，加盟英冠球隊西北部錫菲聯，我求大俠真係感到意外。
一般相信，三十四歲嘅郝海東要實現到歐洲踢波夢想，年齡肯定係最大阻礙；估唔到錫菲聯真係羅致呢位「老妖刀」，重係一簽四年合約，轉會費象徵式收取一英鎊，兌番港幣即係十五蚊，大連實德可中、日、韓謂無條件放人。一月中起程到英倫，以亞洲球員嚟講，都算係第一次見有「高齡」球員到歐洲踢波。
𠵱家英冠聯有早前由西布朗借去南部卡迪夫嘅稻本潤一、中部狼隊有薛琦鉉，加埋郝海東，突然英冠聯有齊中、日、韓球員。亞洲球員要企喺頂級聯賽唔容易，我求大俠認為踢二線聯賽，未嘗唔係壞事。
迪肯尼奧今季離開英超，唔使再喺聖誕、新年踢波咁慘，但佢一樣好忙。據講拉素想透過佢喺英國嘅網絡班兵，幫助游說，頭號目標係車路士中場柏加（同迪肯尼奧係查爾頓舊隊友）；另外迪肯尼奧隊友洛基心郁郁想去英超發展，又搵迪肯尼奧搭路，話佢係半個經紀都無錯。
曼聯球員日前開聖誕晚會，但就發生不愉快事件。據聞一位獲邀請客人踢跌一位曼聯球員，於是乎引起其他紅魔球員幫手，李奧費迪南同朗尼肯定涉及其中；朗尼更加如狼似虎，毫不客氣向客人出拳，最後搞到不歡而散。朗尼早前俾曼聯下達禁酒令，估唔到火氣一樣咁猛。
紐卡素喺英超聯戰績每下愈況，球員場外行為又不檢。桑拿士日前收到倫敦大酒店麗斯發出投訴信，指明對部份紐卡素球員三星期前，喺酒店內搗蛋行為表示不滿。桑拿士喺球隊日前輸畀紅軍後提及呢件事，佢以球員放假為理由，無講到會有任何處分，會唔會秋後算帳，就難講！
喺星期日晚西維爾對貝迪斯場西甲聯，足足遲咗成個鐘先開波。原來因為作客嘅貝迪斯件綠白直間球衣同西維爾件紅白球衣撞衫，球證要佢哋換過，所以貝迪斯職員嗱嗱臨返回球會攞第二件波衫，場波先踢得成。好彩呢場係同市打吡啫，如果唔係，球迷咪等到頸都長埋？