澳門慶回歸，香江的濠賭股炒到㷫烚烚，其中剛剛批完股的邁特科技（1031）至為驚人，股價勁升42.1%，以接近全日最高位的0.54元收市，成交金額高達14億元，多過好多藍籌股。
另外，奧瑪仕（959）、新濠國際（200）、澳門實德（487）同埋信德（242）等，隻隻成交金額都以幾億元計，成個場都俾濠賭股玩晒咁滯。經紀陳話，炒到𠵱家呢個地步，濠賭股已經接近瘋狂，雖然可能重有得去，但呢個時候先至撲落去，則風險未免太大，跟風炒賣者，要食得鹹魚抵得渴。
另外，雖然天氣涼涼哋，但經紀黃就提起泳衣股德發集團（928），隻股將在聖誕假後，在28日公布中期業績，雖然聽聞表現只是不過不失，但因為年中時發行過一批2億幾元的可換股債券，用以支付收購少女服裝品牌，而債券換股價成1元咁高，有炒家憧憬德發或會炒上都未定。
德發下午發力，升7.5％，收0.86元，成交518萬元。
慕容小初