影圈青黃不接 尋找新面孔<br>六大影帝拱照純情少女救市

影圈青黃不接 尋找新面孔
六大影帝拱照純情少女救市

六大影帝曾志偉、梁家輝、任達華、秦漢、劉燁和黃秋生,將於明年拍攝電影《阿嫂》,拱照一名年約十六歲的女新人,監製鄭丹瑞表示現時電影圈青黃不接,所以想借眾影帝的力量去捧出一個接班人,現時正在港全力發掘該名幸運的女主角。

星皓電影公司計劃明年三月開拍電影《阿嫂》,安排於暑假檔期上映,該片由鄭丹瑞(阿旦)監製、黃精甫執導,由六位影帝拱照一名年約十六歲的女新人,現時阿旦正在聯絡的影帝人選包括有曾志偉、梁家輝、黃秋生、吳鎮宇、任達華、胡軍、劉燁和秦漢等,視乎眾人的檔期能否配合,最後會選定六人參演。

落重本錢
一擲二千萬預算費
而女主角人選至今尚未落實,阿旦透露正尋找一名清純女孩子擔任,相信該新人甫出道即會成為影圈焦點。阿旦昨日接受本報電話訪問時,透露現正忙於與一班影帝度期,他說:「𠵱家重係傾緊嘅階段,啲影帝全部都好忙,有啲又唔喺香港,要睇吓佢哋嘅期就唔就到。今個聖誕我會飛去上海同梁家輝傾。
「今次係想搵六個影帝去捧一個新人出嚟,聯絡中同埋將會聯絡嘅影帝包括志偉、鎮宇、秋生、秦漢、劉燁、任達華同胡軍等等,有啲已經應承咗,但重未簽約。」
阿旦又指現時香港電影業如一池死水,若想讓新人迅速走紅,用一眾影帝去烘托是最快捷的方法,他說:「我哋想搵一個全新嘅面孔出嚟做女主角,𠵱家全力揀緊,希望可以精益求精。捧得一個新人,就要畀信心佢,唔係是是旦旦捧一個,搵咁多識做戲嘅老戲骨同佢做對手戲,佢可以得益好多,希望可以搵到個接班人出嚟。但當然呢班都係影帝級大哥,一定要有戲啦。」
而《阿嫂》一片的預算更高達一千五百萬至二千萬元,阿旦說:「淨係六個影帝都唔平啦!難得電影公司肯咁落本去捧個新人,呢個角色構思係要講廣東話嘅,年紀十六、七歲左右,所以都係諗住揀番本地女仔,其實香港都卧虎藏龍。」

青春少艾
嫁黑社會大佬獲新生
《阿嫂》劇情講述一名只有十六歲的女孩子嫁給黑社會大佬,被眾人稱呼為「阿嫂」,參演的一眾影帝將全部扮演大佬的手下。而在全是男人的黑社會世界中,女主角本來不被眾人重視,但最後都被她所感動及懾服。阿旦說:「呢個女仔初時係帶住報復心嘅,最後由一個無情嘅世界去到一個新世界,希望香港嘅電影業都係咁。」
採訪:張止寒

梁家輝(圖)和劉燁兩位影帝將於明年合作新片《阿嫂》。

梁家輝和劉燁(圖)兩位影帝將於明年合作新片《阿嫂》。

曾志偉(左)和黃秋生這對《無間道》拍檔有機會再次合作。 劇照

秦漢七八年憑《汪洋中的一條船》奪得金馬影帝。