上星期日（十二月十二日）本欄講《恨冇水晶球》，談及恒生銀行舊制，老人家退休時嘅退休金計算方法係「服務年資乘二點七五乘最後一個月薪金」，十分優厚。呢條方程式係「老恒生」話畀左丁山聽嘅。
呢日飲茶，又碰到老恒生，佢即刻捉住左丁山講：「喂，原來我記錯咗。你篇文刊登之後，我啲昔日同僚、現在仍然喺恒生服務嘅老友打電話嚟澄清，高層管理人員，陸觀豪、莫偉健佢哋，攞退休金係乘三，唔係乘二點七五嘅。」咦，好肥噃，退休前有三十萬銀一個月嘅話，退休金等於三十乘三乘三十萬，即係二千七百萬，恒生銀行唔會虧待佢。
與老恒生拜拜之後，碰到賓架陳，佢話行經娛樂行，民主黨楊森呼籲中環人捐款畀「社區組織協會」，旁邊有著名漫畫家尊子義售漫畫，好多位慈祥、笑容可掬嘅阿公阿婆站在街上助陣。賓架陳今年九月十二日立法會投票時投票畀民主黨，又鍾意睇尊子漫畫，於是行埋去想話捐錢，但一聽見社區組織協會呢個名稱，想起報紙話嗰位激進女社工張文慧（就係與一位老人家盧少蘭聯繫，控告房委會，阻止領匯上市嗰位），當堂冇癮，掉頭就行。
佢話：「我好想幫啲老人家，但捐錢畀個會，即係有份幫佢出錢畀啲社工，包括張文慧在內，我點啃得落，諗起領匯單嘢就㷫啦。」呢個推論啱唔啱，唔敢講。但與張文慧扯上關係嘅組織到中環籌款，唔知可以籌到幾多呢？
領匯上市，交稿之時，尚未知命運如何，但所有識得嘅賓架都嬲，嬲嘅嘢有好多，不能一一盡錄。呢件事似火燒連環船，一打官司，雙方為咗想贏，各出奇謀茅招，最後連司法制度嘅獨立性都燒埋，全香港都輸晒，此乃最大悲哀。