正式宣布，3G終於進入戰國時代！大家以後唔使揀嚟揀去得一間「3」，因為數碼通同CSL日前終於正式發表推出3G服務，真係等到頸都長咗幾寸，好彩都趕得切喺聖誕節前推出，等大家可以喺聖誕玩吓視像通話。雖然同樣係Sell3G，各有賣點，數碼通就以平價月費取勝，CSL就玩3G轉2.75G夠穩定，可謂各有優點！
記者：劉耀祥 攝影：劉耀祥、陳偉強
數碼通
雖然數碼通同CSL發表3G服務的時間只差一日，不過兩間公司對推出發布3G的態度就相當唔同。前者不斷放風，推出日期由傳聞中嘅10月延遲至聖誕節前，踏入12月更召開多次記者會，首先推出3G網絡的PCNetwork卡，繼而再宣布同Vodafone搞合作，等全港傳媒都捉錯用神，以為宣布推出3G，結果當然失望完一次又一次。而CSL就採用唔聲唔聲嚇你一驚的策略，喺噚日（12月20日）突然宣布推出3G服務，令數碼通嗱嗱臨要喺前一日（19日），趕截胡發表3G服務，齊齊趕過聖誕節。
影片質高無格仔
當人人以為數碼通今次玩3G有獨家日本機撐場嘅時候，發布會上表明今年都只係有MotorolaE1000同Nokia6630，想玩日本機？05年第一季先有得玩！雖然未有獨家機，之但係3G網絡先係今次主菜，名為「SmartoneiNon3G」嘅3G服務，論資訊內容，新聞、足球、體育、音樂、遊戲都有齊，內容就好豐富，但係齋睇牌面欠缺新鮮感。
玩完之後又有唔同睇法，首先開啟「SmartoneiN」首頁，需時約5秒，Download一段新聞或者足球片段，就要用5-10秒，時間上唔算太快，但畫質就認真唔錯，由新聞、足球片段到MV，套套片都好鬼清，同之前玩開嘅3G已經好唔同！
摩記E1000
由於Nokia6630只設有一個鏡頭，所以要用數碼通3G機玩視像會議，選擇就剩番Motorola嘅E1000。雖然冇得揀，但係表現就令人有驚喜。之前玩過視像會議，等對方接通都要少少時間，不過E1000就好快手，直頭同一般聲音通話無異，接通後一秒左右就有畫面睇，值得一讚！而數碼通更加入多張卡通人物圖片，隨時畀你扮做自己，變咗「有你睇到人、冇人睇到你」。不過數碼通已經講到明，唔可以同其他3G網絡手機玩視像，即係只可以同自己友玩！
PROFILE
制式：UMTS/GSM三頻
顯示器：26萬色/240×320像素
賣點：雙120萬像素鏡頭、MP3及MPEG4播放
記憶體：16MB/T-Flash記憶卡
體積：114.3×52.4×22.6mm
重量：138g
查詢：28802688（數碼通）
CSL
結合EDGE及3G制式
CSL今次玩3G，各方面都有別於其他3G網絡商，首先CSL強調其3G並非完全一個重新建造的網絡，而係由其現時的EDGE制式與3G制式整合而成。而記者會上除發表3G服務及手機之外，亦推出無線WiFi寬頻上網服務，所以倒不如講係流動高速上網解決方案更為貼切。由於CSL多番強調其3G網絡係與EDGE整合，所以大家關心嘅覆蓋範圍，3G信號收唔到嘅地方就會自動轉為2.75G（即EDGE制式）。雖然其3G未係全面覆蓋，不過配合2.75G制式，於地鐵、機場等3G去唔到嘅地方，一樣可以利用2.75G玩多媒體功能，所以從另一角度睇，都叫做係一個優勝嘅地方。
下載小說隨街睇
CSL以商務用家為主要目標，冇得玩視像唔係問題，不過多媒體資訊就真係點都唔少得，例牌菜如新聞、電影、音樂，以及交通都有，速度同數碼通都差唔多，由下載到開始播片，都係10秒左右，畫質亦都算唔錯，不過始終6630畫面解像度只有208×176像素，畫面都有少少矇，甚至會有少許格仔情況出現。另一個較有新意嘅內容就係「流動書店」，可以Download小說睇都算係幾新鮮，而且範圍都算幾廣。不過CSL收費就比較複雜，每個月費包含一定Credits額（即C），Send一個MMS就要用10個C，睇新聞就用2個C，絕對唔係一個UserFriendly嘅設計，用家記得要睇清楚。
視像會議要加機座
發布會上，CSL只以Nokia6630一機撐場，單以多媒體功力而言，6630的確勝任有餘，不過6630先天不足，只有一個放喺機背嘅鏡頭，要另加機座先可以玩到視像會議。雖然視像會議功能已經係玩3G機必玩嘅「分唇」，之但係原來CSL志不在此，因為CSL覺得現時使用3G手機用家唔多，兼且現時3大3G網絡商都採取各有各玩嘅政策，仍然未有偈傾，所以未做到跨網視像會議。要玩CSL3G？用嚟上吓網睇片重實際！
Nokia6630
Nokia首部130萬像素之機種，採用Symbian作業系統，相對於同樣採用Symbian作業系統嘅MotorolaA1000，少個Touch芒，價錢就明顯平一大截。而且Nokia於Symbian已經係老手中之老手，整個作業系統非常流暢，直頭係爽得驚人。而且機內規格亦屬於中上規格，除130萬像素鏡頭之外，亦都有藍芽、MP3播放、拍片等功能，最重要係唔啱用唔緊要，因為Symbian作業系統容許用家安裝其他程式，一於唔啱裝到啱為止。
PROFILE
制式：UMTS/GSM三頻
顯示器：6萬5色/208×176像素
功能：48和弦、藍芽、130萬像素鏡頭、MP3及MPEG4播放
記憶體：10MB/MMC記憶卡
體積：110×60×21mm
重量：127g
查詢：28881010（CSL）
兩台好壞點比你睇
數碼通有乜好
1.收費夠簡單，一睇就明
2.免費資訊多，唔畀錢都大把嘢睇
3.視像會議多公仔睇
4.連線遊戲幾好玩
CSL有乜好
1.機價夠平
2.冇得玩視像會議，唔想俾人Check最啱用
3.結合2.75G制式，冇3G都一樣睇到多媒體
4.網頁介面易睇，分類清晰
數碼通有乜唔好
1.手機價錢貴
2.手機款式少
3.地鐵全線覆蓋要等到05年8月
CSL有乜唔好
1.冇3G手機揀，只得Nokia6630
2.月費收費貴
3.玩視像會議要另買機座
誰是贏家？
之前淨係得「3」一間3G服務供應商就話冇得揀啫，家陣多咗數碼通同CSL兩大陣營加入，月費及出機價肯定愈嚟愈吸引。新加入者中以數碼通嘅$128最低入場費較吸引，不過買機冇回贈，而CSL就有得回贈，以專業級人員為市場對象，唔Sell大平賣，以3G轉2.75G穩定性為賣點，對於傾生意唔斷得線嘅用家嚟講，貴啲都絕對值得！
