《餃子》散工冇糧出求助勞工處
馮仁昭四圍超：陳可辛「唔會兩萬幾都欠人」

陳可辛監製、陳果執導、由楊千嬅、白靈同梁家輝主演嘅電影《餃子三更2之一》雖然落咗畫好耐，但竟然有部份製作人員話收唔到錢，噚日重去咗勞工處求助。
馮仁昭同其中一個代表阿昌接觸過，佢話：「陳可辛間公司總共欠班工人二萬幾蚊，我同幾個工人其實係散工，每個人嘅人工都係幾千蚊，但拖到𠵱家都未畀，佢哋公司話畀咗個製片，但我哋就搵極都搵唔到個製片，冇辦法之下惟有搵勞工處幫手。」

「芝麻綠豆嘅小事」
馮仁昭打過畀陳可辛了解，佢話對件事唔係咁清楚，要了解咗件事先，之後佢再打嚟話：「啲錢原來一早畀個製片發放畀散工，如果佢哋收唔到，我已經吩咐公司嘅人盡快解決件事，呢啲係好芝麻綠豆嘅小事，我公司唔會連兩萬幾蚊都欠人，呢件事我會徹查。」

林志玲淋雨冇詐型
台灣名模林志玲噚晚喺台灣出席雜誌兩周年晚會，佢冒雨到場，又冇助手幫佢擔遮，雖然淋濕咗少少，但佢一啲都冇介意，到場之後仍然笑容滿面，馮仁昭都覺得佢好專業。林志玲聽到靚女主播侯佩岑都會嚟，對方重啱啱過咗二十六歲生日，林志玲話：「我要趕快去擁吻她！」

郭晶晶歸隊集訓心情好
中國奧運跳水金牌選手郭晶晶呢個月初已經歸隊集訓，佢日前接受內地傳媒訪問時話：「現在我恢復情況不錯，心情也好了不少，其實除了跳水，別的我甚麼都不會。」○八年北京奧運時，郭晶晶雖然已經二十七歲，但佢相信體力上仍應付得嚟！

余文樂曾非法下載歌曲
香港第一個正版音樂下載網站NWTmusic.com噚日正式誕生，關心妍同余文樂亦有去銅鑼灣出席網站啟用儀式，余文樂話入行前曾經買翻版同非法下載，𠵱家先明白尊重版權嘅重要性。而關心妍原定噚日出新碟《第5元素》，但因碟內登咗佢嘅大露背照，俾佢媽咪喝停出售，關心妍話：「張相係影封套時諗住玩吓，公司唔小心用咗張相。」

寶珮如慘痛經歷寫書
寶珮如五年前嘅交通意外，完全改變咗佢嘅人生，寶珮如近日推出新書《一張寶貝的笑臉》，記錄咗呢段經歷，佢噚日喺銅鑼灣出席新書發布會，其間重淚如雨下，佢話：「我寫呢本書時，係我最艱難嘅時候，呢幾年我不停進行整形手術，而本書嘅版稅收益會捐畀心晴行動。」