由童話改編、後日就喺本地上映嘅聖誕立體動畫《北極快車》，除咗以強勁嘅動畫特技同拍得住《魔戒》嘅場面做賣點之外，金像影帝湯漢斯（TomHanks）喺片中以一項叫做「真人模擬」（performancecapture）嘅新技術，一人分飾六個角色。佢早前喺紐約接受本報訪問，自爆拍聖誕老人戲份嗰陣搞到電影公司辦公室啲人起哄，但佢哋竟然唔知個聖誕老人係邊個。
湯漢斯提到拍《北極快車》嘅好笑嘢時話：「我拍聖誕老人戲嗰陣，要喺電影公司office着住套聖誕老人裝，啲人一見到有聖誕老人就儍咗咁走埋嚟，重好開心咁叫，又要同我影相，但係佢哋當時根本唔知到底係邊個着住套衫，重要嗰陣只係三月份，同埋喺office喎！」
片中嘅聖誕老人、車長、流浪漢、聖誕老人父親以至七歲細路主角，都係由湯漢斯「真人模擬」而成，問佢對𠵱家啲電腦動畫技術做到咁真有乜嘢睇法，佢話：「基於𠵱家所有嘅技術，我又對啲角色有最好嘅理解，我已經唔再受自己嘅性別、身高、頭髮顏色、聲音、膚色、種族所限制，我隨時可以走出嚟扮地球上任何一個人，相反其他演員都可以咁做，梅麗史翠普（MerylStreep）都可以扮我㖭！」
特約記者JoleighLo紐約直擊
