香港領匯（2382）上市，因為阿婆同房委會打官司，搞到滿城風雨，但澳門嗰邊就有國家主席胡錦濤到訪慶回歸，小初睇見都覺得幾欷歔，不如諗吓有咩股票炒重好過。
泛海集團（129）由於股價較資產淨值折讓大，俾人認定有得炒，但偏偏隻股相當惡炒，次次抽上去都好快就跌番落嚟，令捧場客氣餒，但明日泛海公布中期業績，市場估佢有望轉虧為盈，斷估都會做番場好戲啩？
泛海早排一度炒過上去0.445元，但在母公司滙漢（214）講明想減持1％，將泛海由附屬變成聯營公司後，股價即刻回軟，跌番落0.40元樓下。不過，泛海截至今年3月底每股資產值有成0.84元，加上期內酒店業復甦同埋賣樓有錢賺，所以點都夠吸引部份投資者去追捧。
泛海上周五突然抽上，大升7.69％，收0.42元，成交股數急增至5567萬股，金額2288萬元。
至於泛海嘅阿媽滙漢，基於水漲船高的道理，唔排除可以短炒一轉，滙漢上周五升2.66％，收2.90元，成交金額460萬元。
慕容小初