倫敦的主要交通工具不外乎地鐵與巴士，地鐵最方便，又不用塞車，但車廂欠整潔，兼成日壞車，所以在地鐵月台登車前記緊先看看報告板。最乾手淨腳是買一張DayPass，約五英鎊，坐巴士都用得。
一齣《摘星奇緣》令NottingHill聲名大噪，我是《摘》片的超級擁躉，順理成章去朝拜一番。一條鬼佬廟街分成幾段，頭段賣古董，二段賣新嘢，三段賣蔬果。相信道路兩旁有超過一百間賣古董的商店吧，但賣的貨品離不開舊銀器、瓷器及傢俬。由於太多，多到冇心機行，於是行了一間當行了一百間。
賣新嘢嘅舖頭所賣嘅所謂新嘢並唔係太新，最常見嘅係印有「NottingHill」或「PortobelloMarket」嘅Ｔ恤，買嚟做手信亦唔係太實惠，因為求其揀件都要二百元港幣。大家還記得《摘》片中那一個鏡頭直落描述一年四季交替的PortobelloStreet嗎？人家一個鏡頭所用的資金大抵可在香港拍幾齣戲，冇辨法，鬼叫人家講英文。努力搜索在《摘》片中出現過的《BeavisandButt-Head》聖堂七彩玻璃，可惜搵嚟搵去搵唔到。
世界真細小，巧遇有線攝製隊，真係有緣千里能相會，過後才想起忘記了介紹他們去吃「雞肉漢堡」及「冇骨雞髀包」，就在賣古董的那段停了一架小餐車，車上寫着「GermanFood」，即叫即燒，車旁圍了一大群人，兩英鎊一個，賣完算數。那個「冇骨雞髀包」加了大量燒香了的洋葱及秘製酸辣汁，夠膽講句係今次喺倫敦食到最好食兼最抵食嘅美食。記住，下次去NottingHill唔好食午餐，一於去「GermanFood」啪個包，包正！