重現古希臘磅礡戰爭場面
哥連做大帝被虐兩個月

由金像大導演奧利華史東（OliverStone）執導嘅史詩式巨片《亞歷山大帝》，為確保片中嘅戰爭場面更加逼真，導演找嚟曾擔任《雷霆救兵》戰術指導嘅「美國海軍陸戰隊」戴爾德將軍（CaptainDaleDye）擔任軍事指導㖭。

千五臨記變軍人
戴爾德將軍之前為湯漢斯喺《雷霆救兵》做戰術指導，成績係有目共睹。男主角哥連菲路（ColinFarrell）喺電影開拍前，就被戴爾德將軍捉去接受長達兩個月嘅魔鬼式軍事訓練，連臨時演員都要參與三個星期嘅「新兵訓練營」，可見佢哋對戰爭場面係幾認真。
奧利華史東為咗令拍攝更逼真，除咗喺倫敦Pinewood同SheppertonStudios，重建亞歷山大少年時代Pella宮殿同亞歷出大圖書館外，佢重不惜橫跨摩洛哥、泰國等地取景拍攝，俾觀眾體驗亞歷山大帝走遍歐、亞、非三大洲嘅一生，感受吓多文化嘅異國情調。片中重動用咗一千五百個臨時演員，過千支長矛等武器、九千幾支箭，製作費達十一億七千萬港元，都咪話唔誇張。