呢個阿婆唔簡單，搞到領匯（2382）雞毛鴨血，搞到滿城風雨。上周五喺電視螢幕上睇見阿婆同班囂張搞手嗰幾副德性，有人血壓上升，有人MM聲，有人講完「喇嘛公爵」講「喇星公爵」。
滙控C輪4441：滙控（005）上周五跌1.50元，照計所有滙控C輪都要大跌，不過實情唔係咁樣，相當熱門嘅4445企定喺74仙，冇跌。若然C輪行早過正股，則代表滙控跌勢已告一段落，又若然係咁，揀滙控C輪玩，應該要4441。
4441上周五收81仙，冇咗兩格。隻輪明年6月尾到期，溢價1.5%，槓桿率16.1倍（有效10倍），引伸波幅16.6%。4445明年6月初到期，溢價2.6%，槓桿率17.6倍（有效9.9倍），引伸波幅19.4%。4441拍埋4445，壽命、溢價、有效槓桿率、引伸波幅等4項條件，冇一樣唔係靚啲，揀長期C輪，梗係要4441。4441溢價如果同4445一樣係2.6%，隻輪值95仙，𠵱家81仙咋。話要講番轉頭，個市如果唔得，數據靚嘅C輪亦冇法子頂得住地心吸力。
滙控P輪4588：滙控P輪4588係最大成交金額嘅滙控P輪，有24.3球，金額8.8球，收35.5仙，升9%。
滙控P輪有33隻，如果睇淡滙控，4588係最啱短炒嘅對象，明年4月夠鐘，溢價6.6%，槓桿率36.6倍（有效13.7倍），引伸波幅17.4%。造淡揸P輪，最好速戰速決。眾好友頭耷耷之時，話唔埋就係個市有奇逢嗰陣，到時揸C輪者笑揸P輪者喊都未定。無論造好造淡，最好都輕注來玩耍，賭到抹汗則無謂。
章盛