領匯可否在今日上市，執筆時未知道，但李國能話唔可以縮短原訴人考慮上訴嘅日期，原訴人已取得主動權，呢位將近七十歲嘅阿婆大可以等到第二十七日（？）先至到終審庭申請上訴，歷山大廈、怡和大廈、交易廣場內嘅有關律師，粒粒精英，逢係涉及領匯上市嘅，相信都面如死灰，一世英名俾一位無名阿婆玩謝咗，不如全部集體辭職啦。如果領匯上唔到市，今年聘請嘅一班行政人員以後有冇人工攞？
賓架L前幾日請食飯，聲言如果領匯可以星期一（今日）上市，佢再請多一餐。原因並非佢認為官司原訴人有道理，而係佢認為啲保薦人一定唔肯孭，會要求政府提供「絕對擔保」（absoluteguarantee），免佢哋嘅損失，先至肯制，政府是否有此決心，值得懷疑。或者董先生去澳門面聖之後，胡主席畀膽佢，佢可以下令啩？但如此一來，須唔須要立法會財務委員會通過議案，准政府提供擔保呢？又係煩。
投資銀行賓架F講：「照計都可以諗嘅，政府如果提供nolossguarantee，保證以後如果有任何申請領匯股票嘅投資者，無論佢有一股或者十萬股，總之嗰幾十萬個新股東，提出申訴，要求賠償嘅話，領匯、房委會、政府會原銀奉還，等啲保薦人甩身，保薦人應可同意領匯上市。佢哋最怕俾啲美國基金告到飛起啫，有政府擔保就唔怕啦。」
賓架L就媽媽聲，話啲保薦人只識收包銷費（百分之一點七五），一啲風險都唔肯孭，不如由政府最高層出面，請啲保薦人飲咖啡，按吓佢哋手臂（armtwisting）。唉，呢個係弱勢政府，係社工都可以蝦吓佢，國際投資銀行會唔會睇佢面色呀？