今年的Lego展分成不同主題展覽區，包括：香港奇「積」大賞、亞洲風物誌、樂高人仔大全集、經典火車館、歡樂聖誕大合照及奇趣遊樂場等。我們今次直殺入Lego倉、刮出幾位提供展品的SuperLegoFans，來個LegoShow大預演。
記者：陳慧敏
攝影：林栢鈞、楊錦文
Model：Bonny（StarAsia）
明日開鑼的Lego展覽以地標風景物做主題。首先「亞洲風物誌」展出11個、動用超過十萬粒樂高積膠砌成的亞洲地標，有香港會展新翼、中國萬里長城，悉尼歌劇院等等，組成一個超級大景區，部份還設有「機關」按鈕，一按海上風帆就會輕輕搖動。
砌出香港地標
而重頭戲就是「香港奇『積』大賞」這個以香港地標做主題的比賽，在五十多個參賽作品選出八個進入最後決賽，包括：沙田馬場、旺角地鐵站銀行中心出口、灣仔舊郵局、海洋公園等。小記「偷窺」過參賽者作品，其精細同傳神度相當精采（大家佔地面積都是3呎×3呎）。但基於公平理由不得刊登亦不便多說，惟有等讀者們自己親身去睇同投票！
Fans1號
幾可亂真郵政信箱
「乜Lego公司咁勇，偷個公共郵箱放喺公司呀？」小記同攝記望見Lego辦公室中央的郵筒，不約而同打個突。原來這是「香港奇『積』大賞」其中一名參賽者Billy的舊作，像真度90%，對面還有7呎高尖沙嘴鐘樓、電車及九巴模型。
早前Billy為郵政署砌了個一比一大郵筒及郵車，用以玩競猜遊戲贏獎品，誰知像真度實在太高，有人真的丟信入郵筒，搞到郵局工作人員好辛苦先將信刮出來（個郵筒都唔輕㗎！）。之後除了要將郵筒封口外，還要加多個大大個指示牌，喝住啲人唔好投錯信箱，認真誇張。
小學開始搞建設
Billy小學時代已經鍾情Lego搞建設，由初期亂咁砌，到今日專搞大建設，不時幫Lego公司砌展品展出。有時候他還會為了一小件特別配件，專登買幾盒「只用幾小塊」的Lego玩具組，正如為了他腳下的那部九巴模型的茶色車窗，他就專登買了三盒一模一樣的火車站模型組。Billy：「有啲人話車窗有得喺網上訂購，但我就覺得火車站模型嘅茶色車窗先至最啱Feel，咪索性買埋佢囉！有時我都覺得幾嘥錢，我本來都可以舒舒服服咁專心讀書，但為咗支付呢筆興趣費用，我要打工補習賺錢補貼。」
Fans2號
人仔大全集
每盒Lego都有不同主題，人仔造型亦不相同。LegoFans中已經「響晒朵」的「人仔倉」網主Kenny，兩年半來收集了超過3千隻樂高人仔，並將會在《人仔大全集》展區中將近千隻珍藏公諸同好，部份更是Kenny自家改裝創作，獨一無二！
Fans3號
經典火車
首個大型Lego火車展「經典火車館」，由另一位LegoFansRaymond展出近60款由80年代至今的經典樂高火車，部份還只在德國或歐洲等地區有售，拍賣網上流量極少。
由積木到電影器械
Lego由1932年初出道，不過是個木頭公仔玩具，等到1949年才出現首粒Lego磚仔，6年後發展成村莊系列才可以搞大建設。
直至1974年，才出現家庭版人仔，即是Kenny藏品中那隻3吋高媽媽公仔，79年主題公仔出現後Lego人仔終於定型。
不過講到大轉變，可謂1986年開始注入電子元素，1998年Mindstorms系列更可以經電腦滙入資訊，給砌出來的Lego模型下達HitSenses等的簡單指令，2000年LegoStudios系列重堅，與史匹堡侏羅紀系列合作，砌完場景重可以利用所附軟件拍片，做其小導演。
2001年Bionicle殺到，可以合體又型仔的外形顛倒眾生之餘，還給片商看中，拍了兩套電腦動畫外更進攻遊戲界，網路遊戲、PS、XBOX、PCGame等統統大賣，連Nike都找BionicleCrossover出波鞋，邊個話Lego家陣唔夠潮？
必搶特別版精品
LegoFans必搶當然是特別版Lego組裝。這些「特別版」只能在網上訂購，兼且好寸地不送亞洲地區，一般本地Fans想要，就只有託外國朋友訂完寄來香港，郵費一來一回都好襟計。家陣郵費都慳番，每款平均限量20-30份，有買趁手。
其他精采精品
樂高香港奇「積」繽紛show
日期：12月21-30日
地點：沙田新城市廣場1期羅馬圓形獻技場
時間：11:00am-9:00pm
查詢：26849175
備註：香港奇「積」大賞比賽結果將於12月26日公布，投中又被抽中的觀眾更可得Lego聖誕老人公仔一隻。