一個伯爺婆，玩殘董團夥，星期日團夥漏夜開會，討論阿婆盧少蘭搞局，領匯上唔上市問題！結果梗係今日不上市啦！
胡溫同老江，都不斷催促過阿董，要建立強勢行政主導，乜嘢叫強勢行政主導呢？一個伯爺婆，搞到董團夥領匯縮窒冇得上市，又話有五十萬人支持，以一個攞緊生果金嘅伯爺婆，竟敢阻人發達，辱罵、吆喝、拍枱，阿董咁都窒步窒腳，唔通咁就叫做「強勢行政主導」？
好似唔係喎！呢樣嘢，叫做「伯爺婆主導」、「幕後黑手主導」、「終審庭主導」、「社工界主導」，而唔係董某嗌足七年嘅「強勢行政主導」！一海之隔，主人胡錦濤，就喺澳門同何厚鏵小朋友做緊五歲生日會，啱啱吹完蠟燭，試問阿董點樣向我哋大老爺交代？
好多人大罵：盧少蘭呢個伯爺婆，唔識字，何德何能，一定有幕後黑手操縱！幕後黑手係邊個呢？八方揣測，會唔會就係我哋胡溫黨中央呢？因為胡錦濤話：「以民為本」，溫家寶又鬼咁關心弱勢族群，咁盧少蘭老婆婆唔通唔係咩民呢？佢唔係弱勢族群，唔通係強勢Ronnie陳？
不過最衰胡溫嗰句「以民為本」，有少少語病，因為以民為本，冇講到係乜「民」喎！若然係「以股民為本」，咁領匯上市，天公地道，話之你賤賣商場公屋，跟住狂加租，只要股民有錢賺，咁就冇事！
之但係，若然係「以刁民為本」呢，咁盧少蘭婆婆無疑係得到咗胡總書記嘅祝福喎！以刁民為本，即是就算刁民搞局，阻人發達，公屋商場，都係刁民手上嘅本錢，盧婆婆弱勢族群大晒，董團夥不得嘈生晒。
可能因為咁，盧婆婆見胡總親自落澳門同自己撐腰，貧下中農心更雄、膽更壯咯！
而阿董今日就要過澳門「述職」，睇嚟佢冇乜「職」可「述」，不過「行政主導」，點解變咗盧少蘭主導，阿董就要向胡總解釋吓嘞。胡總會唔會嬲起上嚟，將阿董即時解僱開除呢？千祈唔好呀，因為咁樣對阿董唔係幾公道！阿董都係當面乞求胡總行使最高解釋權，問清楚，喺領匯問題上，係以股民為本定係以刁民為本至得㗎？
傳真︰2623-9278
電郵︰