澳門特首何厚鏵真係威到盡，帶住胡主席四圍去，重𠱁到胡主席龍顏大悅，相反我哋香港嘅特首董建華聽日到澳門述職，連畀傳媒影同胡主席大合照嘅機會都冇，低調到死。係咪胡主席見老董連單領匯都搞唔掂，唔知點挺董，索性費時畀機會記者影相時問問題，搞到大家尷尷尬尬，一於閂埋門聽佢述職算囉！
鏵哥噚日安排咗九道菜嘅晚宴，慰勞行咗成日嘅胡主席。八方攞到張菜單睇，啲餸菜嘅名改得好靚，有「滿堂吉慶」──即係燴燕窩、「福祿雙全」──即係南非鮑脯，同埋「加冠晉爵」──即係蟹粉菜肉雲吞，應該都幾好食。
澳門今次好重視胡主席訪問，八方記得上年曾慶紅嚟澳門搞CEPA，大三巴都冇封得咁嚴密，淨係擺咗警察站崗，但今次就用鐵馬圍實晒，重喺胡主席訪問嘅學校附近，擺埋狙擊手布防，真係好誇張！其實澳門人咁愛國，又邊度有人會心懷不軌？使唔使搞到咁嚴陣以待呀？
傳真︰2623-9278
電郵︰