「當時睇嘢完全模糊晒，眼前一片白濛濛、focus（聚焦）唔到，又冇晒立體感，自己個感受唔好。」三次在打網球及羽毛球時不幸被球打中左眼，導致三次短暫失明的邵智賢（Simon），沒有因為多次「飛」來橫禍而怨天尤人，反而深切體會失明的痛苦，推動他成為奧比斯飛機醫院的捐助者，有錢出錢。
「我喺雜誌見到飛機醫院嘅廣告，救盲喎，咪同我隻眼一樣！眼睛睇唔到花花世界嗰種痛苦，我都感同身受，所以咪盡一點心意囉。」Simon自七年前起，每月捐助一百元予奧比斯，上月更有力出力，跟隨奧比斯遠赴內地雲南，探望當地病童。
Simon坦言，最初決定參與這個旅程時，不多不少抱着旅遊的心態，惟經歷了六天體驗之旅，時間一天一天地過，他的體會就愈來愈深。他憶述在當地醫院眼見整個走廊坐着的，都是患有青光眼、斜視眼及白內障等眼疾的病人，看得心也酸了，「原來中國大陸真係有好多咁嘅病人，我當時感受到，我哋真係要去幫吓佢哋，因為佢哋未必有錢睇醫生。雖然成走廊有成四百幾人，我哋幫唔晒，但起碼幫得幾多得幾多。」
他又欣慰自己捐出的金錢，除可讓病人獲得免費治療外，又可為病人提供眼鏡等配套，讓病人重新看清楚世界，並可協助培訓當地醫生進行救盲工作，「諗唔到咁細微嘅地方，我哋嘅錢都可以幫到。當地有個醫生直情好激動咁感激我哋捐錢。」
令Simon最感受捐助意義所在的，是一名已進行復明手術五歲女童的一個微笑，「我送咗一個神奇畫版畀佢，佢冇同我講過一句多謝嘅說話。但係喺佢嘅微笑中，我感受到佢第日可以睇番嘢嗰種開心！」為此，Simon打算提高捐助金額，又會為奧比斯當義工，以盡一點綿力，讓更多病人重見光明。
本報記者
逢周一刊出