陳可辛執導嘅歌舞片《PerhapsLove》出年一月就會開鏡，演員已肯定有金城武、張學友同周迅，聽講部戲嘅故事會講有位內地女子為咗成名，不惜同內地一位有影響力嘅名導演發生關係，個女仔及後終於成名，但為咗進一步蜚聲國際，佢就繼續憑美色去搭上可以幫助佢事業發展嘅男人，最後佢當然能夠達到目的喇，重成為咗一位超級巨星㖭。
呢個角色𠵱家搵咗周迅做，而學友同金城武喺入面會同佢有感情線，戲入面當然亦會有唔少歌舞場面。馮仁昭覺得呢個角色搵內地嘅百花獎影后周迅總係差啲，如果由章子怡做，可能會更有戲味。事關章子怡都係從一個普通嘅內地女演員，到𠵱家好辛苦咁喺國際上捱出知名度，佢應該更加體會到戲裏面角色嗰種艱苦嘅歷程，由佢演番呢個角色，可能會重有神髓呢！
自從林振強喺上年十一月去世之後，香港就少咗個著名填詞人，無綫由聽晚凌晨十二時二十分開始一連五晚，將會推出林振強嘅紀念特輯《愛你多一些》，由前港台DJ陳永業主持，重邀請咗AndersNelson、陳潔靈同向雪懷講吓林振強生前軼事。
模特兒陳沛嘉（Balia）噚日喺西灣河行騷，重即場示範跳社交舞㖭。一向鍾意將感情事攞出嚟講嘅陳沛嘉，揚言聖誕有大量男士想同佢約會，佢話：「其中一個重sent咗五十個SMS約我，不過我已經推咗佢，因為呢啲甜言蜜語唔係好實際。」唔知陳沛嘉係咪喺度暗示送禮物最實際呢？
韓國紅星元斌前日旋風式嚟咗香港出席化妝品宣傳活動，做完嘢之後，佢就去遊船河，欣賞吓維港景色同食晚飯，之後佢差唔多成十一點幾先去到機場搭飛機返韓國，機場有大約六至七十名影迷嚟送機，元斌都好識做，佢同班歌迷握手話別，令班迷開心到暈，之不過佢喺機場擾攘咗咁耐，搞到機場管理局嘅職員都要周圍搵佢去入閘。
譚詠麟噚日去到烏溪沙出席明星足球隊嘅賽事，阿倫話聖誕節會去外地滑雪，不過佢都會趕返嚟出席頒獎禮，支持吓一班新人。今年眾多新人之中，阿倫就睇好組合PingPung同埋房祖名，重覺得佢哋會有獎攞，但係阿倫死都唔肯講話睇好邊個女歌手，因為佢話怕啲女仔小器喎。
