前晚祖雲達斯對AC米蘭，AC隊長馬甸尼賽前一刻熱身時整親，哥斯達古達臨危受命做埋隊長。呢一變連意大利電視台落出場陣容時都改唔切，重有馬甸尼個名；我哋收費台講波佬亦要開波後成七分鐘至SaySorry糾正到；其間，當「達哥」踢波就講錯馬甸尼。雖則話事出突然，但「馬仔」同「達哥」個外形差好遠喎……。
查實開波前鏡頭唔止一次捕捉到「達哥」，計正唔應該搞錯。講番呢位三十八歲老將平時出場時間唔多，今次踢足九十分鐘，除咗有球波有手球之嫌外都無咩犯錯，可算交足貨抵讚。
祖記方面，呢場波明顯踢守勢波，大部份時間捱打，印象中上半場得一次似樣射門。最令人失望莫過於迪比亞路，沉到極，卒之半場被調走。同樣係做隊長，佢就瘀皮得多囉。
相信球迷都記得，佐敦對住騎士總會特別醒神；至於艾華遜遇上公鹿就特別叻。佢喺六日前對公鹿先射入四十分，噚日作客密爾沃基又轟入個人今季最高嘅五十四分，成為現役第七位超越萬五分的球員！不過鷹隊後衞祖舒史密夫重犀利，對小馬時竟然創下十球封截，不愧彈弓人。
前晚墨西拿對阿特蘭大因天雨踢咗廿三分鐘腰斬，當時墨西拿領先一比○。賽後墨西拿強烈抗議，指天氣同場地狀況係差，但一直無變，既然球證覺得唔妥就唔應該開波。原來意甲賽例列明一旦開咗波，就唔能夠響翌日補賽，墨隊總監話𠵱家領先變空歡喜一場，好唔抵喎。
第一位登陸NBA嘅亞洲後衞田臥勇太，噚日俾一哥太陽隊放棄，結束佢短暫嘅NBA之旅。呢位日本球星有速度，但礙於太陽喺尼殊領導下，成績節節上升，表現普通兼早排入咗傷兵名單嘅田臥就冇得留低。不過，田臥只要獲得其他球隊賞識，依然可以喺NBA玩落去！
些路迪同格拉斯哥流浪喺蘇超聯內熱鬥，喺球場外亦各出奇謀。聖誕臨近，兩隊都推出聖誕大碟，不過唔係由球員用老牛聲報佳音，而係由領隊同球員挑選佢哋鍾意嘅歌；著名歌手或樂隊好似洛史超活、BoyzIIMen同SimpleMinds嘅作品等都榜上有名，睇吓到時邊隻碟好賣啲！
逢周一至周五見報