人大常委會副秘書長喬曉陽突然嚟香港主持《基本法》圖書館開幕，立法會議員劉慧卿去唔到，並唔係吊高嚟賣，佢同八方講，呢兩日大傷風病咗，可能係老公惹佢，前晚一早瞓咗，加上call機壞埋，收唔到政制事務局局長林瑞麟電話，到噚日上午回電，先知喬曉陽來港有得會面，但佢一來傷風唔舒服，二來亦係通知得太遲，佢噚日下晝三點要出席自己喺美林邨美槐樓議員聯絡處開幕禮，重請咗民政常秘李麗娟做嘉賓，一齊切燒豬，點好意思臨時甩底改期。
不過卿姐唔去見喬曉陽都冇乜損失，因為噚日嘅安排都幾怪，百幾位嘉賓下晝兩點就到禮賓府，但只係睇住電視現場直播喬曉陽同曾蔭權喺中環大會堂高座圖書館做揭幕儀式。開完幕，嘉賓又枯坐成半個鐘，等喬曉陽到場，之後致完辭，酒會唔夠半小時，李永達、湯家驊等同喬曉陽傾偈時間每人都係得幾分鐘。
（圖）劉慧卿（右四）嘅議員聯絡處噚日開幕，重請到李麗娟（右三）做嘉賓齊齊切燒豬。
傳真︰2623-9278
電郵︰