香港人買手機，多數都係睇外形、功能，跟住就係價錢，反而最貼身嘅手機輻射強弱就比較少留意。其實手機輻射問題，已經講咗好多年，之但係𠵱家手機咁普遍，唔通真係想避都冇得避？咁又唔係，因為日前名為G-HANZ嘅防輻射手機已經正式登陸香港。PDA手機、摺機，甚至只供小孩專用都一樣有齊，實行一炮四響！
記者：劉耀祥
攝影：陳盛臣
ImageGirl：Echo
手機輻射對一般用家嚟講，睇唔到又度唔到，所以買機嘅時候都唔會係首要條件。之不過近年好多研究都顯示長期使用手機，所發放嘅輻射的確係會對人類細胞產生變化，所以防輻射手機絕對唔係花巧之作，反過嚟講，呢樣先係手機最基本嘅要求！
變動電磁場防輻射
據研究顯示，當手機通話時所發放的電磁場，會令身體內的細胞有反應，而且當電磁場持續活動一段時間（約10秒左右），身體內的細胞就會起變化。所以既要保持手機接收能力，又要讓電磁場不致影響身體，絕對係一個非常矛盾嘅課題。而G-HANZ手機的防輻射原理就在於既有嘅手機發射電磁場上，加上一層訊號，令電磁場不斷起伏，打破電磁場持續活動而令身體細胞變化的機會。
可能有人會問，電磁場唔穩定，會唔會減弱手機接收能力？經實際試用之後，呢個顧慮就一掃而空。就算喺室內無窗嘅環境，接收一樣冇問題，通話時亦都無潛水兼窒窒吓，比起一般唔標榜低輻射嘅手機毫不輸蝕！
EG10082吋Touch芒PDA手機
今次G-HANZ初登香港，絕對唔係單天保至尊，一共推出四部新機，各有各特色！四部新機之中，以EG1008最為強勁。具一般手機功能之外，更備有大大個2吋Touch芒，26萬色兼且解像度達126×220像素。雖然會場上只展出測試版本，介面亦只有簡體中文顯示，不過並無損EG1008嘅可玩性。機背設有30萬像素影相鏡頭，雖然唔係百萬像素級別，不過芒夠大搭夠，一樣睇得清清楚楚，影相之餘更可拍片。可惜就係反應一般，㩒完影相掣都要成秒先有反應，而且閃光燈火力頗細，有點力不從心之感！
按圖索驥好易用
EG1008外形甚似Motorola之太極系列，機身上掣都唔多粒，只有開關、音量及影相掣，其他操作就完全靠晒支筆。雖然G-HANZ乃手機界初哥，但係手機整體操作都相當唔錯，圖像介面幾方便易用。而且主打內置PDA功能，所以機內程式亦一大堆，瀏覽器、遊戲、字典及國際時鐘等，當然唔少得PIM功能。由於只係測試版本，畫面轉換及開啟程式都有少少遲緩，相信正式出街時會好好多！
EG1008Profile
制式：GSM900/1800雙頻
顯示器：26萬色/176×220像素/2吋
鏡頭：30萬像素
功能：和弦、JAVA、瀏覽器、PIM、GPRS、字典
備用時間：70-120小時
通話時間：150-240分鐘
體積：85×47×20.5mm
重量：85g
查詢：23953025（G-HANZ）
得得B手機Hi002A小孩專用
除咗EG1008之外，G-HANZ另一新機BabsiHi002A更得人歡心。因為Hi002A專為小朋友而設，除咗外形似「天線得得B」之外，再配合防輻射功能，唔使小朋友細細個就已經受輻射干擾，對成長過程更加健康。由於只係畀小朋友使用，所以一切以簡單為主。用家可預先內存10個電話號碼，不論打出或接收，都只限於呢10個電話號碼，唔怕小朋友細細個就學識煲電話粥。據知下一代更會加入GPS功能，方便屋企人隨時知道小朋友所在位置，身為父母就更加放心！
Hi002AProfile
制式：GSM雙頻
顯示器：單色顯示器
備用時間：50-72小時
通話時間：80-120分鐘
體積：35×37.2×3.76mm
重量：60g
摺機打孖上攻中低檔
G-HANZ唔單止專供小朋友及商務用家，對一般摺機用家亦照顧周到，就好似EG900，具有30萬像素鏡頭，採用雙芒設計，外芒為4,096色，內芒則有6萬5色。功能上則支援WAP、GPRS、世界時鐘及計時。EG900有齊市面上一般手機之功能，就咁睇真係睇唔出係防輻射手機，對於注重身體健康嘅用家就更啱胃口。
而另一新機EG755就係EG900嘅低階版，走入門級路線，只有單芒設計，兼且不具備影相功能，目標都係只求打出打入的用家，更重要就係千零蚊就有防輻射功能，算係幾抵玩。
