今個月樓市幾靜，心急業主都會減少少價，盡快出貨，但沙田好運中心有個單位，作價竟然低市價逾兩成，唔通業主真係對後市睇得咁悲觀？
呢個榆林閣頂層，五百四十呎，只賣百二萬，每呎二千二，比起市價足足低近兩成四。業主七年蝕三成三。
利記徐子豪話，榆林閣頂樓冇電梯到，所以造價一向比樓下平，其實扣除呢個因素，單位都算係市價成交。買家係投資者，第一次喺沙田買樓收租，貪好運中心少呢類五百零呎租盤，估計全包月租五千五，回報五厘半，略高於樓下嘅五厘三。樓下同類單位賣百七萬，月租七千五。
徐子豪話，好運中心𠵱家有一兩個呢類頂層放盤，索價百五萬。
另外，長沙灣泓景臺七座極高層六百九十呎E，利記曾建業話，業主為求套現換樓，以二百六十萬賣出單位，呎價三千七百五，低市價五至八巴仙。
樓市交投活躍，但成交主要係私樓，包括新盤與二手，公屋就比較冷門。屯門建生邨，最近有宗平價二手公屋成交，泰生樓低層十三室，四百九十呎，以十五萬易手，每呎唔使三百一。
祥益方面話，呢單係九八年以十萬購入，升值五成。買家原住同區富泰村細單位，想改善居住環境。
屯門二手公屋盤，主要有建生邨、田景邨及良景邨，夾埋唔夠三十個，叫價十八萬起，成交十八萬到二十萬。
由喜劇巨星周星馳主演嘅聖誕電影「功夫」，勢將掀起「撲飛」熱潮。中原地產為咗獎勵後勤同精英會，特別喺中環皇后戲院預留咗兩場，準備一共送出六百張戲票，等員工放工之後，可以輕輕鬆鬆咁去睇戲。都算係提早嘅聖誕禮物。
另一邊廂，對手美聯物業澳門部，為咗慶祝澳門回歸五周年，日前送出七百張「功夫」戲票畀澳門居民，唔使一粒鐘，已經派清。
近來商舖摸貨與短炒屢見不鮮，蘭西每日都收到好多市場消息，聽見有咁多轉手，覺得好誇張。
業內人士話，商舖市場比較多流料，因為銀碼大，動輒以千萬元計。有時業主透過代理放風，話物業以高價成交，但實情係「左手交右手」，等不知就裏嘅買家中招。
有時就傳出好多客洽購，誘使真正買家追價，畀到業主心目中個價錢成交。所以，有時消息傳傳吓，竟然變成真，就係咁解。
蘭西奉勸買家，最好多求證先扑槌，否則分分鐘買貴貨。
聖誕節就快到，發展商除咗不停推出聖誕優惠，重準備啲小禮物，送畀傳媒朋友。好似恒基西灣河嘉亨灣，周六日一連兩日搞宣傳，準備套精美嘅地球水晶擺設，以及一隻好可愛嘅熊仔公仔畀傳媒。
套擺設用一個紅色禮盒裝住，其中一部份係一個印住恒基標誌嘅水晶台，上面可以放置個水晶地球。
上個禮拜，恒基國金二期總部喬遷酒會，到場嘅嘉賓都獲贈一個水晶擺設，雖然唔知係唔係同一款，不過水晶擺設一定唔會過時，一物多用，喺唔同場合，唔同節日都可以用嚟送畀人，絕對無問題。
電郵地址：
