蘋果日報慈善基金早前送出十二個愛心福袋予基督教家庭服務中心綜合家庭服務，日前由義工向區內弱勢家庭派贈滿載食物的愛心福袋，其中兩位受惠長者李婆婆與鄭婆婆，接過福袋後笑逐顏開。
「嘩！個福袋入面有米、餅乾、罐頭、即食麵同醬油，呢啲食物啱晒我胃口，好多謝社會人士咁有心。」八十六歲的獨居長者李婆婆笑瞇瞇地說。
李婆婆的丈夫去世多年，她育有一子，居於內地。李婆婆曾從事泥水工人，退休後靠領取綜援金生活。
近年，李婆婆飽受風濕骨痛折騰，經常要購買藥物外敷，紓緩疼痛，每月花費不輕。
生活節儉的李婆婆，平日多到食品批發公司或街市購買廉價餸菜。
「自己年紀大、病痛多，冇乜必要都唔會買嘢，寧願慳番啲錢隨時用嚟睇醫生，所以喺食方面一向好求其，經常買啲青菜或者瘦肉分兩餐食。𠵱家你哋有咁多嘢食送嚟，可以幫我慳番唔少買餸錢。」李婆婆坦言。
六十六歲的鄭婆婆收到愛心福袋後，雙眼通紅地表示：「呢幾罐午餐肉同豆豉鯪魚，加埋起碼要幾十蚊，我從未買過呢啲罐頭，係乜嘢味道都唔知。」
鄭婆婆曾從事搬運工人，早年與丈夫仳離，六名孩子居於內地，其次子及媳婦皆屬智障，他們育有一名現年九歲女兒。早前，鄭婆婆申請次子一家三口來港，方便互相照顧。
由於智障的兒媳來港後，須排期等候進行智力評估，才可獲社會福利署發放綜援金及傷殘津貼，故一家四口現靠鄭婆婆與孫女的兩份綜援金度日，經濟緊絀。
百病纏身的鄭婆婆，患心臟病及腎病，另因骨骼疼痛，須定期覆診及服藥，平日甚少外出。
「阿婆對腳唔行得遠，冇本事拎咁大袋嘢食，好多謝蘋果日報咁有我哋啲窮人心，親自拎咁大包米、罐頭同即食麵嚟。」她向記者連聲感激地說。
是次行動由基督教家庭服務中心綜合家庭服務培訓婦女義工，上門向綜援及低收入家庭送贈食物福袋，共有十二個家庭受惠。
「蘋果愛心福袋」專戶捐款編號：C1345
暖流熱線
電話：29908688
傳真：23702192
電郵：
網址：
