新車速報:越級挑戰歐洲轎車<br>現代Sonata$16萬搶客

新車速報:越級挑戰歐洲轎車
現代Sonata$16萬搶客

05年版Sonata,為本地車迷帶嚟耳目一新嘅感覺,絕對唔係換湯不換藥嘅所謂新車系。車身造型全新設計,時尚得嚟重有點點貴氣,車廂布局更係豪華舒適,今次測試嘅2.4公升版本更配上極具玩味嘅加減波。車價與日本輕量級家庭房車相若,但喺最新Sonata身上嘅裝備就達到歐洲中型轎車嘅級數,大有越級挑戰搶客之勢!

記者:馬慶武
攝影:陳智良
Model:Silver(StarAsia)

日本車質素 價平三分一

現代係韓國車廠,經過車款不斷推陳出新,新車發布規模愈搞愈大,喺香港車迷心目中已逐漸建立名牌形象。今次正式見到Sonata嘅新造型,大至車身線條,細微至頭、尾燈造型都有大革新,型格更加入流。最重要係Sonata車價絕對令人有喜出望外嘅感覺,設備比得上同級日本車,但叫價卻只約係日本車嘅三分二,確能令已鎖定目標出車或換車嘅車迷心動,隨時轉軚轉投呢間韓國車廠嘅懷抱。

新式車首 媲美歐洲名牌

到Showroom攞車嘅時候,將於明年一月考車牌嘅ModelSilver已經被Sonata嘅外觀吸引:「呢架咩車嚟㗎?大架得嚟幾有型喎!吓?16萬?咁咪好抵?係咪㗎?」的確,第一眼睇到Sonata一雙新設計方形頭燈及那車頭圓角擾流連霧燈,已經覺得Sonata車頭造型極具霸氣,再睇埋電鍍門柄、門檻,如果唔係認得車頭那極具現代風格嘅網狀入風口及大大個Hyundai標誌,絕對有可能以為呢架係歐洲名牌房車。

反應靈敏 加減波好玩

161匹最大馬力輸出,唔算標青,拍攝當日載住三個人直上藍塘道時,動力表現亦唔算有驚喜,但亦無任何失望,因為車上三人已經相當滿意。尤其係當駕駛者(即係筆者本人),啪過加減波玩弄一番後,發現反應頗靈敏,喺上斜多彎嘅路面環境實用性高,重幾好玩㖭!如果係車主,揸緊車玩緊加減波、再校吓張電動座椅兼開緊天窗嘅時候,發現自己只係駛咗16萬,相信會玩得更加開心!

仿轎3大實證
1.方形頭燈賣相最豪

■方形一體式頭燈內藏指揮燈,時尚得嚟賣相幾高級。

■尾箱極具深度,如Model手中嘅旅行喼,最少可以放6個。

■尾燈組合設計好踏實,切合轎車斯文低調嘅身份。

■網狀入風口極有現代風格,配上電鍍裝飾簡單有個性。

2.真皮座艙奢華裝潢

■前座空間夠,現貨到港時更會配備電動皮椅。

■市場定位為中型轎車,天窗當然係必然裝備。

■後座三個座位都有足夠空間,而且設有頭枕,注重安全又可增加舒適度。

■除真皮軚環外,車內中控台、門邊亦會包上真皮裝飾,強調豪華氣派。

3.實用裝備唔花巧

■除了天窗開關及車頂照明燈,太陽「射」住時都可以好方便咁攞到副黑超擋住。

■引擎輸出不過不失,但筆者最鍾意玩嘅加減波箱反應就夠晒靈敏。

■前座中間位置設有兩層式雜物匣及隱藏式杯架。

■同樣由於呢架Sonata只係供傳媒率先試車之用,所以中控台只裝上音響冷氣,無包真皮裝飾。

■後座座椅可分兩邊放平,可以打通尾箱增加載物空間外,亦方便乘客喺車廂內直接提取尾箱雜物。

HyundaiSonata2.4

引擎:2,359cc直4
馬力:161ps/5,800rpm
扭力:22.3kgm/4,250rpm
傳動:4前速半自動波
懸掛:(前)雙搖臂(後)多連桿
制動:(前)通風碟(後)碟式
輪胎:(前)215/60R16(後)215/60R16
尺碼:4800×1830×1475mm
軸距:2730mm
車重:1471kg
車輛提供:現代汽車(34288288)

■除2.4版本外,Sonata亦有3.3公升版本,最大馬力輸出暴增至233匹,但車價只貴4萬。

其他中型房車精選
本田Accord2.4

點睇:採用2.4公升直4引擎,最大馬力達160匹,操控性亦出眾,係有性能又有點點跑意嘅房車。
車價:$214,800

萬事得Mazda62.3

點睇:外形前衞極富活力,一台2.3公升直4引擎,引發最大馬力178匹,而且底盤穩紮安全可靠。
車價:$219,900

日產Cefiro230

點睇:VQ系列2.3公升V6引擎,馬力輸出173匹,車廂陳設較豪華,擁有寧靜舒適嘅駕駛環境。
車價:
$229,800

豐田Camry2.4

點睇:同級中最為大路之選,直4引擎最大輸出152匹馬力,力量唔算強橫,但性能、舒適度、慳油等整體表現平均。
車價:$235,995