領匯上市，成班中環精英律師、國際賓架，俾幾位「幕後」搞手玩到殘，狼狽之情，世所罕見。聖誕酒會上，碰到一位與領匯無關，但與有關人士接近嘅投資銀行家，佢歎聲連連，嚡嚡聲。佢話：「本來好多老友諗住星期四領匯上市，星期五六就飛，度假滑雪去也，點知因為一個阿婆、一個阿公申請司法覆核，成村人就倒瀉籮蟹，開夜工開到有熊貓眼，如果上唔到市（酒會時間，正在打緊官司），該煨咯，所有計劃都亂晒，美國佬打美式足球，最怕進攻到對方一碼線，即將達陣（touchdown）之際，球員竟然fumble（波甩手）。𠵱家就係咁嘅情況，成班法律精英臨達陣甩手，要搏命搶番個欖球，你諗吓就知有幾狼狽。」
真好笑，點解事先冇諗到呢？賓架話啲律師係有睇過房屋條例第四（一）條嘅，不過覺得控方都冇case，打官司贏硬，驚都唔使驚。佢哋嘅法律觀點可能冇錯，不過在上市前兩三日打官司，正合英文嗰句timeisofessence（按時，時間最要緊），甚至搞到上市時間表大亂，如果單官司在半年前開始，睬佢都嘥氣啦。
事既如此，冇計，要聽法庭裁決辦事，但係幫忙之人，應該講清楚啲，做社工本質上應該扶助弱者，但唔係鼓勵他人打一啲並非關乎切身利益嘅官司啩？究竟係阿婆要打，還是佢背後嘅人要打？佢背後之人點解自己唔挺身而出到法庭入稟，而要搵年老長者綜援戶去打，博同情乎？佢哋有冇諗過老年人成為傳媒焦點，精神體力都受到好大壓力，如果發生乜嘢事，佢背後班人能否心安理得？有人為達目的（反對私有化），不擇手段，言之令人感慨。（按：寫稿後，見到阿婆開記者招待會，成班老友都睇到目瞪口呆，以後唔知點樣防範「阿婆風險」。）