好多人話其中一個增加港產片競爭力嘅方法係要多了解市場，多做調查以配合市場需要去製作電影，我覺得諗法啱，但係方法有啲搞錯咗。
最大嘅問題係有冇老闆或者創作人會因為市場調查報告去主導一部電影嘅產生先？如果有都幾好笑，大家諗吓我哋喺香港可以睇到嘅市場調查係啲乜嘢先。
最易攞到手嘅係一堆數字，票房、入場人數、賣埠價錢、影碟發行價及銷量等。如果跟呢堆數字去分析咁就基本上所有戲都唔使拍，又或者淨係拍《少林足球》《瘦身男女》就一定合乎數字上嘅分析，亦將風險減到最低。亦真係有投資者咁樣同我分析過，我心裏面雖然媽媽聲，但係口頭上亦都同佢繼續分析落去，話畀佢聽不如拍《侏羅紀公園》或者《蜘蛛俠》就更加穩陣。
另外試過有間公司，我每次想開戲，個老闆就叫我攞個故事大綱同marketing啲同事傾吓，睇睇計唔計得掂條數。咁每次marketing個同事當然都會話計唔掂啦，我就好虛心咁問佢到底要點至得呀？佢就好認真咁同我講：「加啲打，有動作就容易啲賣埠。」但係我呢個係愛情片喎？即係點呀？即係講咗等於冇講囉。
成日都睇到啲雜誌嘅所謂市場調查或者訪問有關觀眾會點揀戲睇。通常啲被訪問嘅人，特別係啲靚靚哋嘅OL，又或者係個望落有啲娘但係又以為自己好型嘅西裝友，就梗係第一句會話：「港產一定唔睇。」「一定睇西片先。」我都唔知呢啲係乜嘢準則，如果選特首有得選西人，佢哋咪諗都唔使諗。所以唔好盲目相信市場調查，都係要多啲檢討吓自己，檢討吓拍電影呢件事比較實際啲。