百利保（617）上周五宣布先舊後新配3億股，現價較每股伸手價0.183元，只有5%溢價，抵搞。呢期濠江熱，市場對配股股仔，有好多憧憬，一配完股，炒到飛起。百利保雖則未染指濠江業務，但要咁睇，前排百利保話會認真考慮發展濠江豪宅業務，市場亦亟待項目落實，皆因有咗濠江概念溢價，又唔同玩法。所以，百利保重未踏足濠江之前，現價抵搞。
再講，同系富豪（078）晨早創出1年新高，世城（355）距1年高位29.8%，百利保則高達50%，佢最落後，抵搞。百利保對上一次配股，係今年10月中，當時，每股伸手價0.162元，之後一去無回頭，最高見11月23日0.231元，累積升幅42.5%。伸手之後，有佳績可尋，要搞。
滙漢（214）上周五成交4球6銀碼，係最近10個交易日中最搶眼。只講兩點，滙漢及聯營泛海（129）將喺明日公布05年中期業績（9月止），泛海4月出售淺水灣豪宅，獲利1.7億元，好有機會喺中期入帳，滙漢母憑子貴。第二，呢期滙漢重企喺大半年低位，已經殘到唔殘，若然中期有佳績，唔升之餘，唔通重要跌？上周五所見，泛海已經搶閘升7%，聞到有味，遲早到滙漢。
題外話，呢期話買咗隻雞唔知幾時生蛋，但清楚曉得運用房屋條例第四條（1），阻止領匯（2382）上市嘅盧婆婆，對法律熟悉程度，叻過好多大律師。講時講，提起買雞，好似買股票，至緊要睇清睇楚，認清對象，費事買咗要長揸短歎；一如去街市，買錯咗隻閹雞，隻雞梗唔曉，你又等餐懵，都唔知幾時生蛋啦！
錢雋