每對戀人經過多年愛情長跑，人人都期望大團圓結局。李克勤和盧淑儀拍拖多年，經常被追問婚期，已三十七歲的克勤本打算今年秋天與盧淑儀出埠結婚，但之後又因工作關係，未能抽出空檔完婚，只好將婚事延至明年。
克勤說：「結婚同攞獎唔同，攞唔攞獎都要結婚㗎。我本來打算今年秋天結，但做完左麟右李巡迴都已經九月，抽唔到時間，惟有寄望明年，農曆年應該放到假。」
如此說來，克勤與盧淑儀會在農曆新年拉埋天窗？他卻說：「我唔知，最後港台頒獎禮係一月十九號，之後二十二號我要去肇慶做騷，三月就去美加，中間可能有時間，但我𠵱家真係應承唔到你住，可能出年之內啩！」
克勤透露會與盧淑儀到外地註冊，只邀請至親家人及好友出席見證，然後即往度蜜月，克勤說：「我一定唔會擺酒，應該係結完婚返嚟，發張相話畀大家知，然後切個餅畀大家影張相，同班朋友食吓飯咁囉！」克勤表示與盧淑儀結不結婚分別不大，推動力在於他想生兒育女，相信他婚後很快便會實行「造人」大計。