早兩日睇完《功夫》首映，噚日突然收到周星馳電話，佢好緊張咁四圍問反應，因為佢好希望部戲可以破《少林足球》嘅票房紀錄。星爺同馮仁昭講：「金庸睇完首映，讚部戲好睇，佢係我好尊重嘅前輩，聽到梗係好開心。另一件開心事係今日哥倫比亞公司又同我講，話預售情況好理想，我𠵱家雖然喺內地做緊宣傳，但聽到呢啲消息你話振唔振奮？」
星爺前晚喺北京做完首映，噚日又飛咗去上海宣傳，佢喺內地俾記者問佢點解唔搵梁朝偉同劉德華合作，佢答話：「暫時還沒有想過，我覺得要從故事出發，每部戲找演員根本沒有特定要找誰。」星爺又話自己唔夠自信，每日照完鏡就更加冇自信。哈！哈！可能星爺都知自己唔夠靚仔啦！
王伯昭早排拍劇集《小魚兒與花無缺》而受傷，事後佢話謝霆鋒同張衞健假戲真打，所以報咗公安，但公安局唔受理，後來就發展到告上法院。王伯昭狀告健仔同霆鋒打佢要賠償損失外，佢連公安局懷柔分局楊宋派出所都告埋，不過日前法院經審理之後，認為證據不足，法院駁回佢嘅訴訟要求，不過王伯昭嘅代表律師已表示一定會再提出上訴。
洪金寶噚日出席佢師傅李少華喺佐敦舉行嘅記者會，重俾師傅大讚係一個飲水思源嘅人。洪金寶話唔知周星馳套《功夫》日前搞咗首映，星爺亦冇請佢，洪金寶話：「就算佢請我，我都唔會去，我好忙㗎！」套戲洪金寶都有份參與，但係動作指導就冇佢個名，佢面黑黑咁話：「佢覺得冇用嘅人，就唔識嘅啦，我一啲都唔會介意。」
趙薇早排涉及一單毆打孕婦鄒雪嘅案件，鄒雪告上法院要求趙薇同佢嘅司機吳玨作出賠償。鄒雪嘅律師向法院提交嘅狀詞話，原告鄒雪同趙薇有生意糾紛，以致兩被告喺公眾場所毆打當時已懷孕八個月嘅原告，佢請求法院判兩被告賠醫藥費同誤工費等經濟損失二千二百四十六元人民幣，重要公開道歉。趙薇嘅經理人噚日回應話：「趙薇不想與這樣的人一般見識。」
姚嘉妮噚日喺灣仔行婚紗騷，佢話平安夜係男友林祖輝嘅生日，佢會約埋伍詠薇等一班好友開睡衣派對，姚嘉妮話：「我諗住去鴨寮街買啲性感睡衣玩，不過就未準備好生日禮物。」佢又話見到歐陽妙芝結婚之後，搞到佢有結婚嘅衝動喎！
