近排香港鍾意睇書嘅朋友真係幸福，除咗有間好大型嘅書城喺跑馬地出現，台灣嘅「城邦書店」都殺入灣仔，重有成四層高。為咗隆重其事，城邦書店噚日搞咗個開幕禮同小型酒會，重請嚟大股東、TOM集團嘅真正話事人周凱旋，同埋主理出版事業嘅詹宏志嚟到剪綵㖭！
席間八方走去同周小姐傾偈，周小姐話公司嘅嘢佢就唔講，要講就講佢點keepfit啦！周小姐同八方講，佢除咗玩boxing（拳擊）嚟keepfit外，近排亦開始以睇書嚟keepfit！八方以為聽錯，但周小姐真係話睇書可以消耗卡路里喎！不過佢無講要睇幾多本書至得。
傾傾吓，周小姐推介一本《在上帝與凱撒之間》畀八方。據八方翻查資料，呢本書係講基督教二元政治觀，同埋近代嘅自由主義。
除咗呢本書，周小姐又特登送咗本《不斷幸福論》畀一位記者，重親筆喺本書度寫咗啲鼓勵嘅字句。
八方又走去同台灣出版界奇才詹宏志傾偈，佢話其實香港睇書風氣並唔係大家想像咁差，亦由於香港嘅特別性，佢睇好香港可以成為兩岸書本嘅滙集點。佢重話香港首家城邦書店並唔係一間書店咁簡單，係出版商為讀者提供服務嘅一個延續，暫時無諗過賺蝕嘅問題咁話。
（圖）周凱旋話平時會打吓boxing，睇落又唔似會玩啲咁激嘅運動喎。
傳真︰2623-9278
電郵︰