由人自得：
兼職農夫搞合作社推廣有機耕作

有機耕種在香港發展了十多年，但規模卻遠比日本、台灣等地落後，有機農夫黃零遂與志同道合的農友籌組合作社，為買賣雙方建立直接渠道。但原來這個有機農夫，正職從事保險代理，下田種菜不過是業餘性質，勞心勞力推動有機耕種，只為透過種植而獲得生命的快樂。

記者：尹珊珊　攝影：蔡鴻雯

小檔案
黃零，38歲，中五畢業後曾在布料廠負責品質檢定工作，後轉職從事保險代理，1999年遷居元朗八鄉，2000年建立「我地農莊」，及後參加漁護署的「有機耕作轉型計劃」，現時正積極籌辦「綠色生活合作社」，推廣本地有機蔬菜市場。

保險代理落田耕種

依時到達元朗八鄉的「我地農莊」，莊主黃零早在紅磚石屋前等候我們，農莊規模不算大，大片農地上卻種有多種蔬菜，看得出莊主花了不少心血，慣例交換名片，一瞥，甚麼？保險代理？「保險係我工作，耕田係我興趣。」有機農夫和保險代理，完全風馬牛不相及，皮膚黝黑、身材結實的黃零卻身兼這雙重身份。
他在落馬洲新田出生，在元朗讀書、成長，與務農算有幾分淵源。「細細個屋企養豬，新界人唔多唔少都會種吓嘢，但我家種嘅係餵豬用嘅番薯苗、豬乸菜。」中五畢業後，他搬出九龍，曾在布料廠做品質檢定工作，數年後轉行任保險代理，轉行原因：「性格唔鍾意俾人Control，又懶得日日準時返工，所以入行無耐就自己搞一人保險公司。」1999年，他打算結婚後找個地方長住，經朋友介紹輾轉搬到現址：「一直認為人唔應該住高樓大廈，喺鄉村住，空氣同環境都好得多。」見屋前有大片農地，黃零順理成章開始耕種，翌年一手建立「我地農莊」，他笑道：「初頭諗住種畀自己食，後來見漁護署推行『有機耕作轉型計劃』，橫掂都係種菜，當幫補肥料錢都好，點知會愈搞愈複雜。」

■小狗毛仔和鴨子，是農莊家庭成員之一。

合作社打算售賣的有機農作物

不掘地種菜

黃零朝早下田，下午回公司處理保險業務，近這半年更忙，因他勞心勞力籌備合作社：「經常聽到有人話想食有機菜，講真香港有機農場都有三四十個，但賣嘅同買嘅都無渠道直接接觸。」現時香港的有機農場的農作物多會交到菜統處代售，但由於種種原因，菜價只維持每斤一至兩元，單支付成本也不夠，農民不能維持生計，他遂與一班志同道合的朋友萌生「共同購買」的念頭：「利用合作社形式推行『共同購買』嘅銷售方法，用意係拉近買賣雙方嘅距離，消費者有權議價，甚至可以親身落田了解農作物生產過程，透過公開透明嘅市場運作，變相可鼓勵農友用更好嘅有機方法生產有機農作物，合作社亦會從旁監察，務求消費者買到最優質嘅蔬菜。」
理想遠大，實行不易，得先集合農友意見，再分區聯絡消費者，還要為有機耕種定標準：「標準好難釐定，初頭定得太高，要求唔落有機農藥，有農友擔心會影響收成，又怕無人買要承擔損失。」另一問題是蟲禍，黃零參考外國書籍，嘗試不掘地種菜：「農作物收成後，將豬牛糞堆入泥土，再用雜草覆蓋，令泥土內嘅蟲卵及幼蟲不能成長。」惜還在實驗階段，成效未知，但他的「綠色生活合作社」預計會在下月正式運作。

敢作敢言作風強硬

本月初開始，有機農民可向「香港有機資源中心認證有限公司」申請農作物是否符合有機標準，他對此不留情面批評：「有機認證只係推動商品嘅一種宣傳手法，認證制度好兒嬉，莫講話做化學測試，就連農場都不過係抽樣巡察，農夫要出蠱惑根本唔難。」轉頭他又批評圖書館欠缺關於有機耕種的書籍，農民要吸收資訊也苦無途徑：「漁護署有唔少講農耕嘅書刊，但唔外借，元朗圖書館有幾本呀，不過係英文書，一般農民都未必識睇。」

理想不忘實際

現時「我地農莊」每月生產約300斤蔬菜，搞合作社只為農莊多條出路：「透過種植令我獲得生命嘅快樂，亦可以反思今日嘅世界係咪正常運作，我哋又係咪可以生活得更好。」他是綠色主義者周兆祥的長期讀者，也愛閱讀《信報》老闆林行止的文章：「我認同喺資本主義裏面生存，下下都講錢，但喺自由市場裏面，大家會做更多優質貨保持競爭力，咁社會先會進步。」充滿商業頭腦的他，兩月前開始逢星期六、日在農莊開設私房素菜，七道菜每位收$50，老實說真的不貴，嘗過他的手藝也有板有眼。在實現理想之餘，他也明白世界無免費午餐︰「我唔會講到自己好神聖，錢一定要，如果人人都做義工，咁都唔健康啦！做私房素菜都係諗住開拓客路，推廣有機飲食兼幫補農莊開支。」即使今次肯接受訪問，他也坦白道：「無端端邊個肯拋頭露面？今次無非係博宣傳，自己嘅農莊就話唔需要啫，但合作社就要多人認識。」精明、坦白，絕對是他最大特點。